சவுத்தாம்டன் நகரில் நேற்று இடையிலான உலகக் கோப்பை லீ்க் ஆட்டத்தில் இந்தியா, ஆப்கானிஸ்தான் அணிகள் மோதின. இதில் முதலில் பேட் செய்த இந்திய அணி 224ரன்கள் சேர்த்தது. 225 ரன்கள் சேர்த்தால் வெற்றி எனும் இலக்குடன் களமிறங்கிய ஆப்கானிஸ்தான் அணி 213 ரன்கள் சேர்த்து 11 ரன்களில் தோல்வி அடைந்தது.
உலகக் கோப்பைப் போட்டகளில் பங்கேற்கும் அணிகளில் வலிமை குறைந்த அணியாக ஆப்கன் இருந்தாலும், நேற்றை ஆட்டத்தில இந்திய அணிக்கு பெரும் சவாலாகவே இருந்தது. பந்துவீச்சிலும், பேட்டிங்கிலும் இந்திய அணியை தண்ணி குடிக்கவைத்தனர்.
இந்திய அணி மிகப்பெரிய ஸ்கோரை அடிக்கும் என்று கணக்கிட்டபோது, 224 ரன்களில் சுருட்டியது. அதேபோல ஆப்கானிஸ்தான் அணியில் விக்கெட்டுகள் மளமளவென சரிந்தபோது, முகமது நபி தூண்போல் இருந்து கடைசி ஓவர் ஆட்டத்தை இழுத்துவந்தார். இந்திய அணி வெற்றி பெற்றாலும், எளிதாக வெற்றி வாய்ப்பை ஆப்கானிஸ்தானிடம் இருந்து பெறவில்லை. 6 போட்டிகளில் பங்கேற்று தொடர்ந்து தோல்விகளைச் சந்தித்துள்ளது.
இந்த தோல்வி குறித்து ஆப்கானிஸ்தான் அணயின் கேப்டன் குல்பதீன் நயிப் நிருபர்களுக்கு பேட்டி அளித்தார். அவர் கூறியதாவது:
வலிமை வாய்ந்த இந்தியஅணியை வெல்வதற்கு எங்களுக்கு கிடைத்த வாய்ப்பை நாங்கள் தவறவிட்டது வேதனையாக இருக்கிறது. இந்த உலகக் கோப்பைப் போட்டியில் இதுபோன்று விளையாடியது எங்களுக்கு மிகப்பெரிய சாதனைதான்.
ஆனால், இந்தியா போன்ற பெரிய அணிகள் வெற்றியை அவ்வளவு எளிதாக மற்ற அணிகளிடம் விட்டுக்கொடுத்துவிடமாட்டார்கள். ஒருவேளை இந்திய அணியை வீழ்த்தி இருந்தால், அது உண்மையில் மிகப்பெரிய வெற்றியாக இருந்திருக்கும்.
முகமது நபி தனது திறமை வெளிக்காட்டி, ஆப்கானிஸ்தானிலும், உலக அளவிலும் சிறந்த வீரர் என்பதை நிரூபித்துவிட்டார். உண்மையில், கடைசி ஓவர்கள் வரை போட்டியை இழுத்துக்கொண்டு செல்ல வேண்டும் என்று திட்டமிட்டோம். நாங்கள் போட்ட திட்டப்படிதான் முகமது நபி விளையாடினார்.
எனக்கிருக்கும் வருத்தம் என்னவென்றால், இந்திய அணியை மிகக்குறைவான ஸ்கோரில் சுருட்டியும் கூட எங்களால் போதுமான ரன்களை அடித்து சேஸிங் செய்ய முடியாமல் போய்விட்டது. இது எங்களுக்கு இந்தபோட்டித்தொடரில் மிகப்பெரிய வருத்தமாக இருக்கும்
250 ரன்கள் வரை இந்திய அணி அடித்திருந்தாலும், நடுவரிசையில் எங்கள் வீரர்கள் சிலர் 50 முதல் 80 ரன்கள் சேர்த்திருந்தால் நிச்சயம் இந்தியாவின் ஸ்கோரை சேஸிங்கில் வீழ்த்தி இருப்போம். இந்தியாவின் ஸ்கோர் சேஸிங் செய்யக்கூடியதுதான். கடைசி ஒவரில் முகமது ஷமி எங்களது வெற்றியை எங்களிடமிருந்து பறித்துவிட்டார். ஆனால், பேட்டிங்கில் எதிர்பார்த்த அளவுக்கு எங்கள் பொறுப்பை உணர்ந்து செயல்படவில்லை.
இவ்வாறு குல்பதின் நயிப் தெரிவித்தார்.