இவர பார்த்து கத்துக்கடா; பாகிஸ்தான் வீரருக்கு சோயிப் அக்தர் அட்வைஸ்
விராட் கோலி தான் உங்களுக்குப் பிடித்த வீரர், நாயகன் என நீங்கள் நினைத்தால், அவரைப் போல் விளையாடக் கற்றுக்கொள்ளுங்கள் என்று பாகிஸ்தான் வீரர் பாபர் ஆசத்துக்கு, ஷோயிப் அக்தர் அறிவுரை கூறியுள்ளார்.
தென் ஆப்பிரிக்காவுக்கு எதிரான உலகக்கோப்பை லீக் ஆட்டத்தில் பாகிஸ்தான் அணி 49 ரன்களில் வென்றது. இதில் பாபர் ஆசம் 69 ரன்களும், ஹாரிஸ் சோஹைல் 89 ரன்களும் சேர்த்து வெற்றிக்கு முக்கியக் காரணமாக அமைந்தனர்.
இதில் பாகிஸ்தானின் இளம் வீரர் பாபர் ஆசம் , இந்திய அணியின் கேப்டன் விராட் கோலியை ரோல் மாடலாக வைத்து விளையாடி வருகிறார். இந்த விஷயத்தை பாபர் ஆசம் வெளிப்படையாகவே தெரிவித்திருந்தார்.
பாகிஸ்தான் முன்னாள் வேகப்பந்துவீச்சாளர் ஷோயிப் அக்தர் வெளியிட்ட வீடியோவில், பாகிஸ்தான் வெற்றி, வீரர்கள் குறித்து கருத்து தெரிவித்துள்ளார். அதில் அவர் கூறியிருப்பதாவது:
”நான் பாபர் ஆசமிடம் ஒரு விஷயத்தைத் தெரிவிக்க விரும்புகிறேன். உங்களுக்கு இந்திய அணியின் கேப்டன் விராட் கோலி பிடிக்கும். ரோல் மாடலாக வைத்திருக்கிறீர்கள் என்றால், அவரைப் போல் விளையாடக் கற்றுக்கொள்ளுங்கள். அணி இக்கட்டான சூழலில் இருந்தபோது, விராட் கோலி நன்றாக ஸ்கோர் செய்துள்ளார். விராட் கோலியைப் போல் அதிகமாக ஒரு ரன்கள், இரு ரன்கள் ஓடுவதைக் கற்று, திறமையை மெருகேற்ற வேண்டும்.
விராட் கோலி, ரோஹித் சர்மா, கேன் வில்லியம்ஸன் உள்ளிட்ட வீரர்களைப் பார்த்தால், 50 ரன்கள் அடித்த பின் அவர்களின் ஆட்டத்தில் ஆக்ரோஷம் இருக்கும். அதன்பின் ரன்களை வேகமாகச் சேர்ப்பார்கள். இந்த விஷயத்தை பாபர் ஆசம் கற்க வேண்டும். அதிகமான ஷாட்களை அடிக்கப் பழக வேண்டும்”என்றார்.
தற்போது பாகிஸ்தான் அணி 6 போட்டிகளில் 2 வெற்றிகள் உள்ளிட்ட 5 புள்ளிகளுடன் உள்ளது. இன்னும் அரையிறுதிக்குள் செல்ல அதிகமான வாய்ப்பு இருக்கிறது. பாகிஸ்தான் அடுத்ததாக, நியூஸிலாந்து, ஆப்கானிஸ்தான், வங்கதேசம் அணிகளுடன் மோத உள்ளது. அடுத்துவரும் 3 ஆட்டங்களிலும் பாகிஸ்தான் வென்றால், அரையிறுதிக்கான வாய்ப்புகள் பிரகாசமடையும்.