என்ன இருந்தாலும் தோனி அப்படி செய்திருக்க கூடாது; சச்சின் அதிருப்தி
ஆஃப்கானிஸ்தான் அணிக்கு எதிரான போட்டியின் போது தோனி மற்றும் கேதர் ஜாதவ் ஆகியோரின் பொறுமையான ஆட்டம் ஏற்றுக்கொள்ள முடியாதது என இந்திய அணியின் முன்னாள் வீரரான சச்சின் டெண்டுல்கர் அதிருப்தி தெரிவித்துள்ளார்.
உலகக்கோப்பை கிரிக்கெட் தொடரில் நேற்று முன்தினம் நடைபெற்ற போட்டியில் இந்திய அணியும், ஆஃப்கானிஸ்தான் அணியும் மோதின.
இந்த போட்டியில் முதலில் பேட்டிங் செய்த இந்திய அணி தட்டு தடுமாறி 50 ஓவர்கள் முடிவில் வெறும் 224 ரன்கள் மட்டுமே எடுத்தது. பேட்டிங்கில் இந்திய அணியின் இந்த தடுமாற்றத்திற்கு தோனி மற்றும் கேதர் ஜாதவின் ஆமை வேக ஆட்டமே காரணம் என விமர்சிக்கப்பட்டு வரும் நிலையில், முன்னாள் வீரரான சச்சின் டெண்டுல்கரும் தோனி மற்றும் கேதர் ஜாதவின் பொறுமையான ஆட்டம் ஏற்று கொள்ள முடியாதது என்று தெரிவித்துள்ளார்.
ஆப்கானிஸ்தானுக்கு எதிரான லீக் ஆட்டத்தில் இந்தியா கடுமையாகப் போராடி வெற்றி கண்டது. இந்த போட்டி குறித்து சச்சின்கூறும்போது, “இந்திய அணி விளையாடிய விதம் எனக்கு சற்று ஏமாற்றம் அளித்தது. இந்திய வீரர்கள் இன்னும் கொஞ்சம் சிறப்பாக விளையாடியிருக்க வேண்டும். குறிப்பாக எம்எஸ் தோனி -கேதர் ஜாதவ் ஜோடி விளையாடிய விதம் மகிழ்ச்சி அளிக்கவில்லை.அவர்கள் இருவரும் மிகவும் மந்தமாக விளையாடினார்கள்.
நாம் 34 சுழற்பந்து வீச்சு ஓவர்களை எதிர்கொண்டு 119 ரன்கள் மட்டுமே சேர்த்திருந்தோம். விராட் கோலி ஆட்டமிழந்த பிறகு 38-வது ஓவர் முதல் 45-வது ஓவர் வரை அதிக ரன்களைச் சேர்க்கவில்லை. நடுவரிசை ஆட்டக்காரர்களிடமிருந்து எதிர்பார்த்த ரன்கள் இல்லை. அணியின் மூத்த வீரரான தோனி,இந்த நேரத்தில் பொறுப்பை உணர்ந்து சிறப்பாக ஆடி ரன்கள் குவித்திருக்க வேண்டும். ஆனால் அது நடக்கவில்லை. அப்படி நடந்திருந்தால் நாம் அதிக ரன்கள் சேர்த்திருப்போம்” என்றார்.