மிகப்பெரும் சாதனை படைத்துள்ளார் ஷாகிப் அல் ஹச்சன்
நடப்பு உலகக்கோப்பை கிரிக்கெட் தொடரில் தொடர்ந்து சிறப்பான ஆட்டத்தை வெளிப்படுத்தி வரும் ஷாகிப் அல் ஹசன் இதன் மூலம் புதிய சரித்திர சாதனை ஒன்றையும் படைத்துள்ளார்.
உலகக்கோப்பை கிரிக்கெட் தொடரின் இன்றைய போட்டியில் ஆஃப்கானிஸ்தான் அணியும், வங்கதேச அணியும் மோதி வருகின்றன.
சவுத்தாம்படனில் நடைபெற்று வரும் இந்த போட்டியில் டாஸ் வென்ற ஆஃப்கானிஸ்தான் அணியின் கேப்டன் குல்புதீன் முதலில் பந்துவீச்சை தேர்வு செய்தார்.
இதனையடுத்து முதலில் பேட்டிங் செய்த வங்கதேச அணி நிர்ணயிக்கப்பட்ட 50 ஓவர்கள் முடிவில் 7 விக்கெட்டுகள் இழப்பிற்கு 262 ரன்கள் எடுத்துள்ளது.
இதில் வங்கதேச ஆல்ரவுண்டர் ஷாகிப் அல் ஹசன் 69 பந்துகளில் 1 பவுண்டரியுடன் 51 ரன்கள் என்று இன்னொரு அரைசதம் கண்டு 2019 உலகக்கோப்பைத் தொடரில் இதுவரை 6 போட்டிகளில் 476 ரன்கள் என்று 95.20 சராசரியுடன் முதலிடம் வகிக்கிறார்.
இவருக்கு இன்னொரு மகுடம் இன்று கிடைத்தது. உலகக்கோப்பை கிரிக்கெட்டில் 1000 ரன்கள் மைல்கல்லை எட்டிய முதல் வங்கதேச வீரர் என்ற சாதனையை நிகழ்த்தினார் ஷாகிப் அல் ஹசன்.
மொத்தமாக 1000 உலகக்கோப்பை ரன்களை எடுத்த 19வது வீரர் ஆனார் ஷாகிப். இன்று 35 ரன்கள் எடுத்திருந்த போது ஷாகிப் இந்த மைல்கல்லை எட்டினார்.
இங்கிலாந்துக்கு எதிராக மிகப்பிரமாதமான 121 ரன்களையும் வெஸ்ட் இண்டீஸுக்கு எதிரான வெற்றியில் 124 ரன்களையும் எடுத்து பிரமாதமாக ஆடிவருகிறார் ஷாகிப் அல் ஹசன்.
முன்னதாக வங்கதேச அணியில் லிட்டன் தாஸ் 16 ரன்களில் முஜீப் உர் ரஹ்மானிடம் வெளியேற, தமிம் இக்பால் 36 ரன்களில் மொகமது நபியின் முன்னால் வந்து ஆட வேண்டிய பந்துக்கு பின்னால் செல்ல பந்து சற்றே வேகமாக சறுக்கிக் கொண்டு வர பவுல்டு ஆனார். 82/2 என்ற நிலையில் சேர்ந்த முஷ்பிகுர் ரஹிம் (83), ஷாகிப் அல் ஹசனுடன் சேர்ந்து 61 ரன்களைச் சேர்த்த போது ஷாகிப் அல் ஹசன், முஜீப் உர் ரஹ்மான் பந்தில் எல்.பி.ஆனார். சவுமியா சர்க்காரையும் முஜீப் 3 ரன்களில் எல்.பி.செய்ய 32 ஓவர்களில் 151/4 என்று ஆனது வங்கதேசம்.
ஆப்கான் அணியில் லெக் ஸ்பின்னர் முஜீபுர் ரஹ்மான் 39 ரன்களுக்கு 3 விக்கெட்டுகளையும் குல்பதீன் நயீப் 2 விக்கெட்டுகளையும் சத்ரான், நபி தலா 1 விக்கெட்டையும் வீழ்த்த ரஷீத் கான் 10 ஓவர் 52 ரன்கள் என்று விக்கெட் கைப்பற்ற முடியாமல் போனார்.