நீ எல்லாம் எதுக்கு டீம்ல இருக்கு; ஆல் ரவுண்டரை வம்புக்கு இழுத்த ஆகாஷ் சோப்ரா
கிங்ஸ் லெவன் பஞ்சாப் அணியின் ஆல் ரவுண்டரான ஜிம்மி நீஷமை முன்னாள் இந்திய வீரர் ஆகாஷ் சோப்ரா வாண்டடாக வம்புக்கு இழுத்துள்ளார்.
இந்திய கிரிக்கெட் அணியின் முன்னாள் வீரரான ஆகாஷ் சோப்ரா, நடப்பு ஐபிஎல் தொடர் குறித்து தினம் தினம் தனது கருத்துக்களையும், கணிப்புகளையும் கூறி வருகின்றனர். தனக்கென தனி யூடியூப் சேனல் ஒன்றை வைத்துள்ள ஆகாஷ் சோப்ரா அதன் மூலமும் தொடர்ந்து பல்வேறு கருத்துக்களை கூறி வருகிறார்.
இந்தநிலையில், சமீபத்தில் ஆகாஷ் சோப்ரா பதிவிட்ட ட்வீட் ஒன்றில், எதற்கு இருக்கிறார் என்றே தெரியாமல் பஞ்சாப் அணியில் இருக்கும் ஜிம்மி நீஷமை கடுமையாக விமர்சித்துள்ளார்.
இது குறித்து ஆகாஷ் சோப்ரா பதிவிட்டுள்ள ட்வீட்டில், “‘’பஞ்சாப் அணி நீஷமை தொடர்ந்து ஆடவைக்கிறது. வெளிநாட்டு வேகப்பந்து வீச்சாளரான அவர், பவர்ப்ளேயிலும் வீசுவதில்லை, டெத் ஓவரிலும் வீசுவதில்லை. பேட்டிங்கில் 4 அல்லது 5ம் வரிசையிலும் இறங்குவதில்லை; நல்ல ஃபினிஷரும் இல்லை; பெரிய பவர் ஹிட்டரும் இல்லை. பிறகு ஏன் தான் எதற்குமே உதவாத ஒரு வீரரை பஞ்சாப் அணி ஆடவைக்கிறது?” என்று ஆவேசமாக கேள்விக்கணைகளை வீசினார்.
ஆகாஷ் சோப்ராவின் இந்த திடீர் ட்வீட்டால் கடுப்பான ஜிம்மி நீஷமும் உடனடியாக ஆகாஷ் சோப்ராவிற்கு பதிலடி கொடுக்கும் வகையில் ட்வீட் ஒன்றை பதிவிட்டுள்ளார்.
இது குறித்து ஜிம்மி நீஷம் பதிவிட்டுள்ள ட்வீட்டில், “‘’18.5 என்ற சராசரியுடன், 90 என்ற ஸ்டிரைக் ரேட்டுடன் ஆடும் வீரரும் மேட்ச் வின்னர் அல்ல’’ என்று ஆகாஷ் சோப்ராவின் பேட்டிங் சராசரி மற்றும் ஸ்டிரைக் ரேட்டை சுட்டிக்காட்டி பதிவிட்டார் நீஷம்.
ஜிம்மி நீஷமின் பதிலடிக்கு பதிலடி கொடுத்த ஆகாஷ் சோப்ரா, ‘’மிகச்சரி என் நண்பரே. அதனால் தான் என்னை எந்த அணியும் எடுக்கவில்லை; வேறுவிதமாக நான் சம்பாதித்துக் கொண்டிருக்கிறேன். உங்கள் பிரச்னை, எனது பேட்டிங் புள்ளி விவரமாகத்தான் இருக்கிறதே தவிர, எனது பார்வையிலிருந்து நீங்கள் முரண்படவில்லை. எஞ்சிய போட்டிகளில் நீங்கள் சிறப்பாக ஆட வாழ்த்துகள்’’ என்று தெரிவித்தார் ஆகாஷ் சோப்ரா.