பேட்ஸ்மேன்கள், அடிக்கிறேன் என்கிற பெயரில் எளிதாக விக்கெட் இழந்து வெளியேறிக் அணியை தோல்வியில் தள்ளுகிறார்கள் என கடுமையாக விமர்சித்திருக்கிறார் இந்திய அணியின் முன்னாள் வீரர் மதன் லால்.
தென்னாபிரிக்காவில் நடைபெற்ற டெஸ்ட் தொடர் மற்றும் ஒருநாள் தொடர் இரண்டையும் இந்திய அணி எதிர்பாராத வகையில் படுதோல்வியை சந்தித்து, இழந்திருக்கிறது. முதல் டெஸ்ட் போட்டி மட்டுமே இந்திய அணிக்கு சாதகமாக அமைந்தது. 2வது மற்றும் 3வது டெஸ்ட் போட்டிகளில் தோல்வியைத் தழுவியது.
அதைத் தொடர்ந்து ஒருநாள் தொடரின் மூன்று போட்டிகளிலும் தோல்வியைத் தழுவியது. இந்த தொடர் முழுவதும் இந்திய அணியின் மிடில் ஆர்டர் கேள்விக்குறியாக இருக்கிறது. ஒரு விக்கெட் விழுகையில், வரிசையாக மூன்று அல்லது நான்கு விக்கெட்டுகளை கொடுத்து அணியை இக்கட்டான சூழலுக்கு தள்ளியுள்ளனர். இதுபோன்ற ஒரு குற்றச்சாட்டை முன்வைத்து இந்திய அணியை குறிப்பாக பேட்ஸ்மேன்களை கடுமையாக விமர்சித்திருக்கிறார் முன்னாள் இந்திய வீரர் மதன்லால்.
அவர் கூறுகையில், “இலக்கை அடைந்து வெற்றியை பெற வேண்டும் அல்லது குறிப்பிட்ட இலக்கை கட்டுப்படுத்தி வெற்றி பெற வேண்டுமென இந்திய வீரர்கள் எண்ணி இருந்தாலும், அவர்களது அணுகுமுறை அவ்வளவு ஆர்வமாக இல்லை. மிடில் ஆடர் பேட்ஸ்மேன்கள் உள்ளே வந்து மிகப்பெரிய ஷாட்டுகள் அடிக்க போகிறேன் என்ற பெயரில் எளிதாக கேட்ச் கொடுத்து ஆட்டமிழந்து, அணியை இக்கட்டான சூழலுக்கு தள்ளியிருக்கிறார்கள். இதன் காரணமாகத்தான் இரண்டு தொடர்களிலும் தோல்வியை சந்தித்திரக்கிறோம்.
தொடரை எளிதாக வெல்லும் அணி என பார்க்கப்பட்ட போது பேட்ஸ்மேன்களின் அசால்ட்டான அணுகுமுறையால் இத்தகைய தோல்வி வந்திருக்கிறது. இதே போன்ற நிலை அடுத்தடுத்த தொடர்களிலும் தொடர்ந்தால் இந்திய அணியின் எதிர்காலம் கேள்விக்குறியாகி விடும். கேப்டன் மற்றும் பேட்ஸ்மேன்கள் இருவரும் தங்களது அணுகுமுறையை முற்றிலுமாக மாற்ற வேண்டும்.
இளம் வீரர் ரிஷப் பண்ட் இன்னும் கூடுதல் பொறுப்பு எடுத்து விளையாடுவது நல்ல அணுகுமுறையாக இருக்கும். மூன்றாவது ஒருநாள் போட்டியில் எளிதாக இந்திய அணி வெற்றி பெற்றிருக்க முடியும். ஆனால் அவர் வந்த வேகத்தில் ஆட்டமிழந்து சென்றது பின்னடைவாக அமைந்துள்ளது. இனிவரும் போட்டிகளில் இதனை கருத்தில் கொள்ள வேண்டும்.” என அறிவுறுத்தினார்.