2021ல் ரவிச்சந்திரன் அஸ்வின் தான் மிகச் சிறந்த பந்துவீச்சாளர் என ஆஸ்திரேலிய அணியின் முன்னாள் சுழற்பந்து வீச்சாளர் பிராட் ஹாக் கணிப்பு தெரிவித்துள்ளார்.
2021 ஆம் ஆண்டு இந்திய அணியின் முன்னணி சுழற்பந்து வீச்சாளர் ரவிச்சந்திரன் அஸ்வினுக்கு மிகச் சிறந்த ஆண்டாக அமைந்து இருக்கிறது. ஏனெனில் கிட்டத்தட்ட நான்கு வருடங்களுக்கு பிறகு, சர்வதேச டி20 போட்டிகளில் மீண்டும் இடம் பிடித்தார். மேலும் 2021 ஆம் ஆண்டு இறுதியில் வெளியிடப்பட்ட, தென் ஆப்பிரிக்க அணியுடன் ஜனவரி மாதம் நடைபெறவிருக்கும் ஒருநாள் தொடரில் பங்கேற்கும் இந்திய அணியிலும் இடம் பிடித்திருக்கிறார்.
2021 ஆம் ஆண்டு டெஸ்ட் போட்டிகளில் அதிக விக்கெட்டுகளை வீழ்த்தியவர் பட்டியலில் 54 விக்கெட்டுகள் உடன் முதல் இடத்தில் இருக்கிறார். இதற்கு அடுத்த இடங்களில் பாகிஸ்தான் அணியை சேர்ந்த சாகின் அப்ரிடி மற்றும் ஹசன் அலி இருவரும் 47 மற்றும் 41 விக்கெட்டுகள் முறையே எடுத்து இரண்டாவது மற்றும் மூன்றாவது இடங்களில் இருக்கின்றனர்.
டெஸ்ட் போட்டிகளில் அதிக விக்கெட்டுகள் மற்றும் டி20 மற்றும் ஒருநாள் போட்டிகளில் மீண்டும் இடம் என அஸ்வினுக்கு ஒரு கனவு ஆண்டாகவே மாறி இருக்கிறது. குறிப்பாக டி20 உலகக் கோப்பை தொடரிலும் இடம்பெற்று கடைசி மூன்று போட்டிகளில் அஸ்வின் மிகச் சிறப்பாக பந்து வீசினார். அதைத் தொடர்ந்து நடந்த நியூசிலாந்து அணியுடனான டி20 போட்டிகளில் அபாரமாக பந்துவீசினார்.
இந்நிலையில் 2021 ஆம் ஆண்டு மிகச் சிறந்த பேட்ஸ்மேன்கள் மற்றும் பந்துவீச்சாளர்கள் குறித்து தனது கணிப்பை தெரிவித்த ஆஸ்திரேலிய அணியின் முன்னாள் சுழற்பந்து வீச்சாளர் பிராட் ஹாக் கூறுகையில்,
“ரவிச்சந்திரன் அஸ்வினுக்கு கடந்த ஆண்டு நினைத்து பார்க்க முடியாத அளவிற்கு பந்துவீச்சு இருந்திருக்கிறது. மேலும் டி20 மற்றும் ஒருநாள் போட்டிகளிலும் அவர் மீண்டும் இடம் பிடித்திருக்கிறார். ஒரே ஆண்டில் 50 விக்கெட்டுக்கு மேல் எடுப்பது என்பது அவ்வளவு எளிதல்ல. அதனை அஸ்வின் செய்து காட்டியிருக்கிறார். வேகப்பந்து வீச்சாளர்கள் பலரிருக்க அஸ்வின் இத்தகைய சவாலை செய்து முடித்து இருப்பது மிகப்பெரிய சாதனையாக பார்க்கிறேன்.
இந்திய துணைக்கண்டம் சுழல் பந்துவீச்சுக்கு சாதகமாக இருக்கலாம். ஆனால் வெளிநாட்டு மைதானங்கள் அப்படி அல்ல. அதை ஒரு சவாலாக எடுத்துக்கொண்டு அஸ்வின் நன்றாக செயல்பட்டிருக்கிறார். தற்போது தென் ஆப்பிரிக்கா அணியுடனான தொடரிலும் கட்டுப்படுத்தி ஒருசில விக்கெட்டுகளையும் எடுத்திருக்கிறார். ஆகையால் எந்த வித சந்தேகமும் இன்றி கடந்த ஆண்டின் சிறந்த பந்துவீச்சாளராக அவரை கருதுவேன்.” என்றார்.
மேலும் பேசிய அவர், 2021 ஆம் ஆண்டில் 1708 ரன்களை டெஸ்ட் போட்டிகளில் அடித்த ஜோ ரூட், அந்த ஆண்டின் சிறந்த பேட்ஸ்மேனாக அவர் தேர்ந்தெடுத்தது குறிப்பிடத்தக்கது.