சொந்த கோட்டையில் ஆடும் சிஎஸ்கே.. முதலில் பேட்டிங் செய்கிறது.. அணியில் என்னென்ன மாற்றங்கள்?

சென்னை சேப்பாக்கம் மைதானத்தில் முதலில் பேட்டிங் செய்கிறது சென்னை சூப்பர் கிங்ஸ் அணி. அணியில் என்னென்ன மாற்றம் என்பதை கீழே பார்ப்போம்.

16ஆவது ஐபிஎல் சீசன் கடந்த மார்ச் 31ஆம் தேதி துவங்கி நடைபெற்று வருகிறது. இன்று நடைபெறும் ஆறாவது லீக் போட்டியில் சென்னை சூப்பர் கிங்ஸ் அணி, லக்னோ சூப்பர் ஜெயின்ட்ஸ் அணியை எதிர்கொள்கிறது. இந்த போட்டி சென்னை சேப்பாக்கம் மைதானத்தில் நடைபெறுகிறது.

கிட்டத்தட்ட நான்கு வருடங்களுக்கு பிறகு சென்னை சேப்பாக்கம் மைதானத்தில் ஐபிஎல் போட்டிகள் நடைபெறுவதால், ரசிகர்கள் மத்தியில் மிகப்பெரிய எதிர்பார்ப்பு நிலவி வருகிறது.

லக்னோ சூப்பர் ஜெயின்ட்ஸ் அணி தனது முதல் போட்டியை டெல்லி கேப்பிட்டல்ஸ் அணிக்கு எதிராக விளையாடி, 50 ரன்கள் வித்தியாசத்தில் அபாரமாக வெற்றி பெற்று கையோடு இரண்டாவது போட்டிக்கு வந்திருக்கிறது. அதேநேரம் சிஎஸ்கே அணி தனது முதல் போட்டியில் குஜராத் டைட்டன்ஸ் அணியிடம் தோல்வியை தழுவியுள்ளது. ஆனாலும் சேப்பாக்கம் மைதானத்தில் சொந்த ரசிகர்கள் மத்தியில் விளையாடுவதால் கூடுதல் பலத்துடன் இருக்கிறது.

இன்றைய போட்டியில் களமிறங்கும் சென்னை சூப்பர் கிங்ஸ் அணியில் எந்தவித மாற்றமும் செய்யப்படவில்லை. ஒரு மாற்றத்துடன் லக்னோ அணி இன்றைய போட்டிக்கு களமிறங்குகிறது.