இந்திய அணி உலககோப்பையை வெல்வதற்கு வேகப்பந்து வீச்சாளர் ஜஸ்பிரித் பும்ராஹ் மிகவும் உதவியாக இருப்பார் என ஆஸ்திரேலியா அணியின் முன்னாள் கேப்டன் மைக்கேல் கிளார்க் தனது கருத்தை தெரிவித்துள்ளார்.
ஒருநாள் போட்டிக்கான உலக கோப்பை தொடர் இங்கிலாந்தில் நடைபெற்று வருகிறது. தற்போது நடைபெற்றுவரும் லீக் போட்டிகளில் இதுவரை நியூசிலாந்து மற்றும் இந்தியா ஆகிய இரு அணிகள் மட்டுமே எந்த ஒரு தோல்வியையும் சந்திக்காமல் சிறப்பாக ஆடி வருகின்றன. போட்டி நடத்தும் நாடான இங்கிலாந்து இதுவரை ஆடிய 6 போட்டிகளில் இரண்டில் தோல்வியை சந்தித்துள்ளது.
இந்திய அணி பேட்டிங் மற்றும் பவுலிங் இரண்டிலும் மிகச் சிறப்பாக செயல்பட்டு வருகிறது. பேட்டிங்கில் ரோகித் சர்மா, விராத் கோலி இருவரும் சிறப்பாக ஆடி வருகின்றனர். இவர்களுக்கு பக்கபலமாக கே எல் ராகுல் நல்ல துவக்கம் அமைத்துக் கொண்டு வருகிறார். இந்திய அணியின் நடுவரிசை மட்டுமே சற்று கேள்விக்குறியாக உள்ளது. பந்துவீச்சில் முன்னணி பவுலராக ஜஸ்பிரித் பும்ராஹ் அசத்துகிறார். அதே நேரம் முதல் மூன்று போட்டிகளில் நான்கு ஆடிய புவனேஸ்வர் குமார் காயம் காரணமாக ஆப்கானிஸ்தான் அணிக்கு எதிரான போட்டியில் வெளியில் அமர்த்தப்பட்டு அவருக்கு பதிலாக முகமது சமி உள்ளே கொண்டு வரப்பட்டார்.
அதை சரியாக பயன்படுத்தும் வண்ணம் முஹம்மத் சமியும் ஆப்கானிஸ்தான் அணிக்கு எதிராக இறுதி ஓவரில் மிகச்சிறப்பாகவே பந்து வீசி ஹாட்ரிக் விக்கெட் வீழ்த்தி வெற்றிக்கு உதவினார்.
பும்ராஹ் பிரமாதம்
ஒருநாள் போட்டியில் பந்து வீச்சாளர்கள் தரவரிசையில் முதலிடத்தில் இருக்கும் வேகப்பந்து வீச்சாளர் ஜஸ்பிரித் பும்ராஹ், உலகக் கோப்பை தொடரிலும் மிகச் சிறப்பாக தனது பங்களிப்பை கொடுத்து வருகிறார். இதுவரை ஆடிய 4 போட்டிகளில் 7 விக்கெட்டுகள் மட்டுமே வீழ்த்தி இருந்தாலும், ரன்களை சிறப்பாக கட்டுப்படுத்தி பேட்ஸ்மேன்களை திணறடித்து வருகிறார். இவரது எக்கானமி 4.92 மட்டுமே.
மைக்கேல் கிளார்க் கருத்து
2015ஆம் ஆண்டு ஆஸ்திரேலிய அணி உலக கோப்பையை வெல்வதற்கு வழி நடத்திச் சென்ற அன்றைய அணியின் கேப்டனான மைக்கேல் கிளார்க் இந்தியாவின் இளம் வேகப்பந்து வீச்சாளர் பும்ராஹ் குறித்து தனது கருத்தினைத் தெரிவித்துள்ளார்.
“இந்திய அணி உலகக் கோப்பையின் இறுதிப் போட்டி வரை சென்றால், கோப்பையை வெல்வதற்கு இளம் வேகப்பந்து வீச்சாளர் பும்ராஹ் நிச்சயம் உதவிகரமாக இருப்பார். எதிர் அணிக்கு கடும் சவாலாகவும் திகழ்வார்.
குறிப்பாக இறுதிகட்ட ஒவர்களில் பும்ராவின் பங்களிப்பை கடந்த சில வருடங்களாக கிரிக்கெட் உலகமே கண்டு இருக்கிறது. இதன் காரணமாகத்தான் உலகின் தலை சிறந்த பந்துவீச்சாளராக இன்றளவும் இருக்கிறார்” என்றார்.