வெஸ்ட் இண்டீஸ் அணிக்கு எதிரான முதல் ஒருநாள் போட்டியில் இந்திய அணிக்கு அறிமுகமான தீபக் ஹூடா தனது ட்விட்டர் பக்கத்தில் இந்திய அணிக்கு விளையாட வாய்ப்பு கிடைத்தது கௌரவமாக உணருகிறேன் என்று பதிவிட்டுள்ளார்.
பிப்ரவரி 6ஆம் தேதி நடைபெற்ற வெஸ்ட் இண்டீஸ் அணிக்கு எதிரான முதல் ஒருநாள் போட்டியில் இந்திய அணிக்கு முதல் முதலில் தேர்வான இளம் நட்சத்திர ஆல்ரவுண்டர் தீபக் ஹூடா தனது முதல் போட்டியிலேயே மிகவும் அபாரமாக செயல்பட்டு 32 பந்துகளில் 26* ரன்கள் அடித்து அசத்தியுள்ளார்.
உள்ளூர் போட்டிகள் மற்றும் ஐபிஎல் போட்டிகளில் மட்டும் பங்கேற்று விளையாடி வந்த தீபக் ஹூடா இந்திய அணியில் வாய்ப்பு கிடைக்கும் என்று நீண்ட நாட்களாகவே காத்துக் கொண்டிருந்தார். ஆனால் அவருக்கு வெஸ்ட் இண்டீஸ் அணிக்கு எதிரான முதல் ஒருநாள் போட்டியில் தான் வாய்ப்பு கிடைத்தது, கால தாமதமாக கிடைத்த வாய்ப்பாக இருந்தாலும் அதை தீபக் ஹுட சரியாக பயன்படுத்தி 26* ரன்கள் அடித்து இந்திய அணியின் வெற்றிக்கு உதவியாக இருந்தார்.
இதனால் ஹர்பஜன் சிங் போன்ற இந்திய அணியின் முன்னாள் வீரர்கள், இந்திய அணியில் தீபக் ஹூடா இணைந்திருப்பது பார்ப்பதற்கே மகிழ்ச்சியாக உள்ளது என்று தெரிவித்துள்ளனர்.
இந்த நிலையில் தீபக் ஹூடா தனது ட்விட்டர் பக்கத்தில் பதிவிட்டுருந்ததாவது, இந்திய அணிக்காக விளையாடுவதற்கு வாய்ப்பு கிடைத்தது கௌரவமாகவும் ஆசீர்வாதமாகவும் உள்ளது. குறிப்பாக இந்திய அணியின் தொப்பியை இந்திய அணியின் முன்னாள் கேப்டன் விராட் கோலியின் கையில் வாங்கியது மகிழ்ச்சிகரமான தருணமாக இருந்தது, என்னுடைய பயணத்தில் என் உடன் இருந்த அனைவருக்கும் நன்றியை தெரிவித்துக்கொள்கிறேன் என்று தீபக் ஹூடா பதிவிட்டிருந்தார்.
வெஸ்ட் இண்டீஸ் அணிக்கு எதிரான முதல் போட்டியில் வெற்றி பெற்ற இந்திய அணி, தனது இரண்டாவது ஒருநாள் போட்டியை பிப்ரவரி 9 நாளை விளையாட உள்ளது குறிப்பிடத்தக்கது.