3 டி20 ஆட்டங்கள், 2 டெஸ்ட் ஆட்டங்களில் விளையாட வங்கதேச அணி இந்தியாவுக்கு வந்துள்ளது. டி20 தொடரை ரோஹித் சா்மா தலைமையிலான இந்திய அணி 2-1 என்ற கணக்கில் கைப்பற்றியது.
இந்நிலையில் இந்தியா, வங்கதேச அணிகள் இடையிலான முதல் டெஸ்ட், மத்தியப் பிரதேச மாநிலம், இந்தூரில் இன்று தொடங்கியுள்ளது.
டாஸ் வென்ற வங்கதேச அணியின் புதிய கேப்டன் மொமிநுல் ஹக் டாஸ் வென்று பேட்டிங்கைத் தேர்வு செய்தார். இந்திய அணியில் நதீமுக்குப் பதிலாக இஷாந்த் சர்மா சேர்க்கப்பட்டுள்ளார்.
இந்திய அணி விவரம்: ரோகித் சர்மா, அகர்வால், புஜாரா, கோலி, ரகானே, ஜடேஜா, சகா, அஷ்வின், ஷமி, யாதவ், இஷாந்த்.
வங்காளதேச அணி
வங்காளதேச அணி: இம்ருல் கயீஸ், ஷத்மான், மிதுன், மொமினுல் ஹக், முஷ்பிகுர், மஹ்முதுல்லா, லித்தன், மெகிடி, தாய்ஜூல், அபு ஜாயேத், எபடாட்.
Photo by Deepak Malik / Sportzpics for BCCI
இந்திய அணி ஆரம்பம் முதல் சிறப்பாகப் பந்துவீசியதால் ரன் எடுக்க வங்கதேச பேட்ஸ்மேன்கள் திணறினார்கள். தொடக்க வீரர்கள் இம்ருல் கைஸும் இஸ்லாமும் தலா 6 ரன்கள் சேர்த்து முறையே உமேஷ் யாதவ், இஷாந்த் சர்மா பந்துவீச்சுகளில் ஆட்டமிழந்தார்கள்.
கவனமாக 36 பந்துகள் வரை எதிர்கொண்டு 12 ரன்கள் எடுத்த முகமது மிதுன் 12 ரன்களில் ஷமி பந்துவீச்சில் எல்பிடபிள்யூ முறையில் ஆட்டமிழந்தார். 24-வது ஓவரில் முஷ்ஃபிகுர் ரஹிம் அளித்த கேட்சை நழுவவிட்டார் விராட் கோலி.
இந்தூரில் முதல் நாளன்று வேகப்பந்துவீச்சுக்குச் சாதகமாக இருக்கும். நான் டாஸ் வென்றிருந்தால் பந்துவீச்சைத் தான் தேர்வு செய்திருப்பேன் என கோலி சொன்னது போலவே முதல் நாள் ஆட்டத்தின் முதல் பகுதி, வேகப்பந்துவீச்சுக்கு ஏற்றவாறு இருந்துள்ளது. சுழற்பந்துவீச்சாளர்களை விடவும் வேகப்பந்துவீச்சாளர்களே அதிக ஓவர்களை வீசியிருக்கிறார்கள்.
முதல் நாள் உணவு இடைவேளையின்போது வங்கதேச அணி, 26 ஓவர்களில் 3 விக்கெட் இழப்புக்கு 63 ரன்கள் எடுத்துள்ளது. ரஹிம் 14, ஹக் 22 ரன்களுடன் களத்தில் உள்ளார்கள்.