எல்லாரும் இங்க இப்படி தான் தம்பி… கவலைப்படாம இருங்க; கே.எல் ராகுலுக்கு அட்வைஸ் கொடுக்கும் கம்பீர்..
கிடைத்த வாய்ப்பில் நெருக்கடியில்லாமல் விளையாடுங்கள் என கே எல் ராகுலுக்கு கௌதம் கம்பீர் அறிவுரை கொடுத்துள்ளார்.
இந்திய அணியின் மிக முக்கிய வீரர்களில் ஒருவராக வளம் வந்த கே.எல் ராகுல், 2022 ஐபிஎல் தொடருக்கு பின் ஏற்பட்ட காயம் மற்றும் கொரோனா தொற்று ஆகிய காரணத்தால் நீண்ட காலம் விளையாடாமல் இருந்தார். பின் ஆசியக் கோப்பை தொடருக்கு முன் இந்திய அணியில் விளையாட துவங்கிய கே.எல் ராகுலால் முன்பை போல் சிறப்பான ஆட்டத்தை வெளிப்படுத்த முடியவில்லை.
இந்தத் தொடரில் சிறப்பாக செயல்படுவார்.. அடுத்த தொடரில் சிறப்பாக செயல்படுவார்.. என இந்திய அணி இவருக்கு பல வாய்ப்புகளை கொடுத்தும், இவரால் சொல்லிக் கொள்ளும் அளவிற்கு சிறப்பாக செயல்பட முடியவில்லை இதனால் இந்திய அணியில் முக்கியத்துவத்தை இழந்த கே எல் ராகுல் இந்திய அணியின் துணை கேப்டன் பதவியில் இருந்தும் தூக்கப்பட்டுள்ளார்.
குறிப்பாக எதிர்வரும் இலங்கை அணிக்கு எதிராக தொடரில் பங்குபெறும் இந்திய அணி 3 ஒருநாள் மட்டும் 5டி20 தொடரில் விளையாடவுள்ளது. இதில் டி20 தொடரில் இருந்து தூக்கப்பட்ட கே எல் ராகுலுக்கு ஒருநாள் தொடரில் மட்டும் வாய்ப்பு கொடுக்கப்பட்டுள்ளது. இந்த தொடரிலும் இவர் மோசமான ஆட்டத்தை வெளிப்படுத்தினால் இவருடைய கிரிக்கெட் எதிர்காலமே கேள்விக்குறியாக விடும் என்று பெரும்பாலானோ எச்சரிக்கை விடுத்துள்ளனர்.
மேலும் கே.எல் ராகுல் தன்னுடைய இழந்த பார்மை மீட்டெடுப்பதற்கான தேவையான ஆலோசனைகளையும் முன்னாள் வீரர்கள் மற்றும் கிரிக்கெட் வல்லுனர்கள் கொடுத்து வருகின்றனர்.
அந்தவகையில், இந்திய கிரிக்கெட் குறித்தும் இந்திய அணி வீரர்கள் குறித்தும் வெளிப்படையான கருத்துக்களை பேசி வரும் இந்திய அணியின் முன்னாள் வீரர் கவுதம் கம்பீர், கே.எல் ராகுலுக்கு கிடைத்திருக்கும் வாய்ப்பை நெருக்கடியில்லாமல் விளையாட வேண்டும் என அறிவுரை கொடுத்துள்ளார்.
அதில்,“உங்களால் எதை கட்டுப்படுத்த முடியுமோ அதை மட்டும் நாம் கட்டுப்படுத்த முடியும். உங்களால் தேர்வாளர்களையோ அல்லது அடுத்த தொடரில் என்ன நடைபெற உள்ளது என்பதையோ கட்டுப்படுத்த முடியாது. உங்களுக்கு இலங்கை அணிக்கு எதிரான மூன்று ஒரு நாள் போட்டியில் பங்கெடுத்து விளையாடும் வாய்ப்பு கிடைத்துள்ளது. அதில் ஆடும் லெவனில் வாய்ப்பு கிடைத்தால் அப்பொழுது அந்த போட்டி உங்களுடைய கட்டுப்பாட்டில் வந்துவிடும். அந்த நிமிடத்தில் உங்களால் கட்டுப்படுத்த முடியாததை நினைத்தீர்கள் என்றால் நீங்கள் நெருக்கடியை சந்திப்பீர்கள்” என கே.எல் ராகுலுக்கு.,கவுதம் கம்பீர் அறிவுரை கொடுத்துள்ளார்.