பெங்களூருக்காக விளையாடனும்… விராட் கோலிக்கு ஒரு சாம்பியன் கோப்பைய ஜெயிச்சு கொடுக்கனும்; ஆசையை வெளிப்படுத்திய ஆஃப்கானிஸ்தான் வீரர்
ஐபிஎல் தொடரில் ராயல் சேலஞ்சர்ஸ் பெங்களூர் அணிக்காக விளையாட விரும்புவதாக ஆஃப்கானிஸ்தான் அணியின் நட்சத்திர வீரரான நஜிபுல்லாஹ் ஜார்டன் தெரிவித்துள்ளார்.
இந்தியாவில் கடந்த 2008ம் ஆண்டில் இருந்து நடத்தப்பட்டு வரும் ஐபிஎல் தொடருக்கு பெரும் ரசிகர் பட்டாளமே உள்ளது. ஆஸ்திரேலியா உள்ளிட்ட பல நாடுகளும் ஐபிஎல் தொடரை போன்று தங்களது நாட்டில் உள்ளூர் டி.20 தொடரை நடத்தினாலும், எந்த தொடருமே ஐபிஎல் போன்று பிரபலமடையவில்லை என்பதே உண்மை. இதனால் ஐபிஎல் தொடரில் விளையாடுவது பல நாட்டு இளம் வீரர்களின் கனவை போன்றே மாறி வருகிறது.
அடுத்த வருட ஐபிஎல் தொடருக்கான மினி ஏலம் டிசம்பர் 19ம் தேதி நடைபெற இருக்கும் நிலையில், ஐபிஎல் தொடரில் ராயல் சேலஞ்சர்ஸ் பெங்களூர் அணிக்காக விளையாட விரும்புவதாக ஆஃப்கானிஸ்தான் அணியின் நட்சத்திர வீரரான நஜிபுல்லாஹ் ஜார்டன் தெரிவித்துள்ளார்.
இது குறித்து நஜிபுல்லாஹ் ஜார்டன் பேசுகையில், “இந்தியாவில் நடத்தப்படும் ஐபிஎல் தொடரில் விளையாட வேண்டும் என்பது அனைத்து கிரிக்கெட் வீரர்களின் கனவாக தான் இருக்கும். எனக்கும் ஐபிஎல் தொடரில் விளையாட வேண்டும் என்ற கனவு உள்ளது. ஐபிஎல் தொடரில் நான் ராயல் சேலஞ்சர்ஸ் பெங்களூர் அணிக்காக விளையாட விரும்புகிறேன். விராட் கோலி இதுவரை ஐபிஎல் தொடரில் சாம்பியன் பட்டத்தை வென்றது இல்லை, ஆனால் இந்த முறை பெங்களூர் அணி கோப்பையை வெல்லும் என நான் நம்புகிறேன்”என்று தெரிவித்தார்.