இங்கிலாந்து – ஆப்கானிஸ்தான் அணிகள் மோதும் உலகக்கோப்பை தொடரின் 24-வது லீக் ஆட்டம் மான்செஸ்டரில் இன்று நடைபெற்றது.
டாஸ் வென்ற இங்கிலாந்து பேட்டிங் தேர்வு செய்தது. அந்த அணியின் பேர்ஸ்டோவ், ஜேம்ஸ் வின்ஸ் தொடக்க வீரர்களாக களம் இறங்கினர்.
வின்ஸ் 26 ரன்கள் எடுத்த நிலையில் ஆட்டமிழந்தார். அடுத்து பேர்ஸ்டோவ் உடன் ஜோ ரூட் ஜோடி சேர்ந்தார். இந்த ஜோடி அபாரமாக விளையாடியது. பேர்ஸ்டோவ் 99 பந்தில் 90 ரன்கள் எடுத்த நிலையில் ஆட்டமிழந்தார்.
மூன்றாவது விக்கெட்டுக்கு ஜோ ரூட் உடன் கேப்டன் மோர்கன் ஜோடி சேர்ந்தார். மோர்கன் முதலில் இருந்தே சரவெடியாக வெடித்தார். இதனால் இங்கிலாந்தின் ஸ்கோர் ஜெட் வேகத்தில் உயர்ந்தது. ஜோ ரூட் 88 ரன்னிலும், மோர்கன் 71 பந்தில் 4 பவுண்டரி, 17 சிக்சருடன் 148 ரன்கள் குவித்து ஆட்டமிழந்தார்.
இறுதியில், இங்கிலாந்து அணி நிர்ணயிக்கப்பட்ட 50 ஓவரில் 6 விக்கெட்டுக்கு 397 ரன்கள் குவித்துள்ளது.
அதன்பின், 398 ரன்கள் அடித்தால் வெற்றி என்ற இமாலய இலக்குடன் ஆப்கானிஸ்தான் களமிறங்கியது. குல்பதின் நயீப் 37 ரன்னிலும், ரஹமத் ஷா 46 ரன்னிலும், அஸ்கர் ஆப்கன் 44 ரன்னிலும் அவுட்டாகினர்.
ஆப்கானிஸ்தானின் ஹஷ்மத்துல்லா ஷஹிடி ஓரளவு தாக்குப்பிடித்து 76 ரன்கள் எடுத்து வெளியேறினார்.
இறுதியில், ஆப்கானிஸ்தான் அணி 247 ரன்களை மட்டுமே எடுத்தது. இதையடுத்து, இங்கிலாந்து அணி 150 ரன்கள் வித்தியாசத்தில் அபார வெற்றி பெற்றது.
இங்கிலாந்து சார்பில் அடில் ரஷித், ஜோப்ரா ஆர்ச்சர் தலா 3 விக்கெட்டும், மார்க் வுட் 2 விக்கெட்டும் வீழ்த்தினர்.
7 சிக்ஸர்கள்
ஒரு பந்துவீச்சாளர் அதிகபட்சமாக உலகக் கோப்பையில் 6 சிக்ஸர்கள் அடிக்கவிட்டதே அதுவரை சாதனையாக இருந்தது. ஹோல்டர் பந்துவீச்சில் டிவில்லியர்ஸ் அடித்திருந்தார். ஆனால் இன்றைய ஆட்டத்தில் ரஷித் கானின் ஒட்டுமொத்த ஓவரில் மோர்கன் மட்டும் 7 சிக்ஸர்களை வெளுத்துவாங்கி மோசமான சாதனையை ரஷித்துக்கு பரிசளித்துவிட்டார். ரஷித்கானின் இன்றைய எகானமி ரேட் 12.22. இதில் ஒட்டுமொத்தமாக 11 சிக்ஸர்கள் ரஷித் கான் ஓவரில் அடிக்கப்பட்டன. 1999-ம் ஆண்டுக்குப்பின் உலகக்கோப்பைப் போட்டியில் மோசமான பந்துவீச்சுஇதுவாகும்.
22 சிக்ஸர்கள்
இந்த உலகக் கோப்பைப் போட்டித் தொடர் தொடங்கியதில் இருந்து மோர்கன் இதுவரை 22 சிக்ஸர்கள் அடித்துள்ளார்.
4-வது பெரிய ஸ்கோர்
ஆப்கானிஸ்தானுக்கு எதிராக இங்கிலாந்து 6 விக்கெட் இழப்புக்கு 397 ரன்கள் சேர்த்ததே உலகக் கோப்பைப் போட்டியில் 6-வது மிகப்பெரிய ஸ்கோராகும். இதற்கு முன் உலகக்கோப்பைப் போட்டியில் இங்கிலாந்தின் சிறந்த ஸ்கோர் 386 ஆக இருந்தது, அந்த சாதனையை அந்த அணியே முறியடித்துக்கொண்டது