ரவி பிஸ்னோய் நம்பர் 1 பந்துவீச்சாளர் தான்… ஆனா எப்பவுமே இந்த இந்திய வீரர் தான் கெத்து; சுனில் கவாஸ்கர் வெளிப்படை
இந்திய அணியின் சீனியர் வீரரான ஆல் ரவுண்டர் ரவீந்திர ஜடேஜாவை முன்னாள் இந்திய வீரரான சுனில் கவாஸ்கர் வெகுவாக பாராட்டி பேசியுள்ளார்.
தென் ஆப்ரிக்கா சென்றுள்ள இந்திய கிரிக்கெட் அணி, தென் ஆப்ரிக்கா அணியுடன் மூன்று போட்டிகள் கொண்ட டி.20 தொடரில் பங்கேற்றுள்ளது.
இந்த தொடரின் முதல் போட்டி மழை காரணமாக ரத்து செய்யப்பட்டிருந்த நிலையில், இரு அணிகள் இடையேயான இரண்டாவது டி.20 போட்டி 12ம் தேதி நடைபெற்றது. இந்த போட்டியில் பேட்டிங்கில் மிக சிறப்பாக செயல்பட்ட தென் ஆப்ரிக்கா அணி, 5 விக்கெட் வித்தியாசத்தில் மிரட்டல் வெற்றியும் பெற்றது.
தென் ஆப்ரிக்கா அணிக்கு எதிரான இரண்டாவது போட்டிக்கான ஆடும் லெவனில் டி.20 போட்டிகளுக்கான தரவரிசையில் நம்பர் 1 வீரரான ரவி பிஸ்னோய் இடம்பெறாதது விவாதத்தை ஏற்படுத்தியிருந்த நிலையில், ரவி பிஸ்னோயிற்கு பதிலாக ரவீந்திர ஜடேஜாவிற்கு ஆடும் லெவனில் இடம் கொடுத்தது சரியான முடிவு தான் என முன்னாள் இந்திய வீரரான சுனில் கவாஸ்கர் தெரிவித்துள்ளார்.
இது குறித்து சுனில் கவாஸ்கர் பேசுகையில், “ஆடுகளத்தில் சிறிதளவு சுழல் இருந்தாலும் ரவீந்திர ஜடேஜா போட்டியில் பெரிய தாக்கத்தை ஏற்படுத்திவிடுவார். ஆடுகளம் சுழற்பந்து வீச்சிற்கு சாதகமாக இருந்தால் ஜடேஜாவின் பந்துவீச்சை எதிர்கொள்வது மிக கடினம். எப்படிப்பட்ட பேட்ஸ்மேனையும் ரவீந்திர ஜடேஜாவால் இலகுவாக சமாளிக்க முடியும். ஆடுகளம் சுழலுக்கு சாதகமாக இருக்கும் பட்சத்தில் ரவீந்திர ஜடேஜா வீசும் ஒவ்வொரு ஓவர்களும் இந்திய அணிக்கு மிக முக்கியமானதாக இருக்கும். ரவி பிஸ்னோய் தற்போது நம்பர் 1 பந்துவீச்சாளர் தான், ஆனால் அவர் சர்வதேச போட்டிகளில் இன்னும் தனக்கான இடத்தை உறுதி செய்து கொள்ளவில்லை” என்று தெரிவித்தார்.