உஸ்மான் கவாஜவை பின்னுக்குத் தள்ளுங்கள், ஸ்டீவ் ஸ்மித் உள்ளே வரட்டும்: ஆஸி முன்னால் ஜாம்பவான் கடுப்பு!

2019ம் ஆண்டில் ஆஸ்திரேலிய அணியின் வெற்றிகளில் பெரும் பங்கு வகித்ததோடு, அதிக ஸ்கோர்களை எடுத்த வீரர்கள் பட்டியலில் 2ம் இடத்தில் இருக்கிறார் உஸ்மான் கவாஜா, நேற்று கூட நியூஸிலாந்துக்கு எதிராக அவர் ஒருமுனையைத் தாங்கி 88 ரன்களை எடுக்க விக்கெட் கீப்பர் அலெக்ஸ் கேரி 72 பந்துகளில் 71 ரன்களை விளாச ஆஸ்திரேலியா 243 ரன்களை எட்டியது, இவர்களது 107 ரன்கள் கூட்டணி இல்லை என்றால் ஆஸ்திரேலியாவின் ஸ்கோர் 150-160 ரன்களுக்கு முடங்கி தோல்வி கூட ஏற்பட்டிருக்கும்.

2019 உலகக்கோப்பையில் இதுவரை 298 ரன்களை 37.25 என்ற சராசரியின் கீழ் எடுத்துள்ளார். இரண்டு அரைசதங்கள்.

இந்நிலையில் தொடர்ந்து கவாஜாவை இலக்காக்கி வருகிறது ஆஸி அணி நிர்வாகமும் முன்னாள் வீரர்களும்.

முன்னாள் கேப்டன் இயன் சாப்பல் கவாஜா பற்றி கூறியதாவது:

இப்போது கவாஜாவை அவர்கள் விட்டு விட முடியாது. அவர் தொடக்கத்தில் களமிறங்கவில்லையெனில் நான் அவரை அணியில் வைத்திருக்க மாட்டேன். ஸ்மித் 3ம் நிலையில் இறங்க வேண்டும், ஆனால் கவாஜாவை இனி தவிர்க்க முடியாது.

ஒருநாள் கிரிக்கெட் தொடங்கிய முதல் நாளிலிருந்தே சதமெடுக்கும் மூன்று வீரர்கள் முன்னணியில் தேவை. அந்த மாதிரி சதமெடுக்கும் 3 வீரர்களைத் தேர்வு செய்வது அவசியம்.

நான் 3ம் நிலையில்தான் இறங்குவேன், என்னை விட குறைவாகப் பேட் செய்யும் திறமை கொண்டவர்களை நான் எனக்கு முன்னால் இறங்க அனுமதிக்க மாட்டேன்.

நான் ஸ்டீவ் ஸ்மித்தாக இருந்திருந்தால். நான் நிச்சயமாக ‘நண்பர்களே எனக்கு 3ம் நிலை வேண்டும்’ என்று கேட்டுப்பெறுவேன். எனவே ஸ்டீவ் ஸ்மித், கவாஜாவை பின்னுக்குத் தள்ளி 3ம் நிலையில் இறங்க வேண்டும் என்று நான் கருதுகிறேன்.

இவ்வாறு கூறினார் இயன் சாப்பல்

உலகக் கோப்பை தொடரில் நேற்று நடந்த போட்டியில் ஆஸ்திரேலியா- நியூசிலாந்து அணிகள் மோதின. லாட்ஸ் மைதானத் தில் நடந்த போட்டியில் டாஸ் வென்ற ஆஸ்திரேலிய அணி, முதலில் பேட்டிங் செய்ய தீர்மானித்தது.

நியூசிலாந்து வீரர்களின் துல்லியமான பந்துவீச்சால், வார்னர் 16, ஆரோன் பின்ச் 8, ஸ்மித் 5, ஸ்டொய்னிஸ் 21, மேக்ஸ்வெல் 0 என ஆஸ்திரேலிய வீரர்கள் அடுத்தடுத்து ஆட்டமிழந்தனர். இதனால், அந்த அணி 92 ரன்களுக்குள் 5 விக்கெட்டை இழந்து தடுமாறியது.

சரிந்த அணியை உஸ்மான் கவாஜா, விக்கெட் கீப்பர் அலெக்ஸ் கேரி ஜோடி மீட்டது. இருவரும் நிதானமாக விளையாடி ரன்களை சேர்த்தனர். கேரி அதிரடியாக விளையாடி  71 ரன்கள் எடுத்து ஆட்டமிழந்தார். இறுதிவரை போராடிய கவாஜா 50வது ஓவரில் 88 ரன்களுக்கு அவுட் ஆனார்.

அவரது விக்கெட்டை தொடர்ந்து அடுத்த இரண்டு பந்துகளில் ஸ்டார்க், பேரண்ட்ராப் ஆகிய இருவரை அடுத்தடுத்து வெளி யேற்றி ஹாட்ரிக் விக்கெட் வீழ்த்தினார் நியூசிலாந்தின் போல்ட். இதன் மூலம் இந்த உலகக் கோப்பை தொடரில் இரண்டாவது வீரராக ஹாட்ரிக் விக்கெட் எடுத்துள்ளார்.

இதற்கு முன் இந்தியாவின் ஷமி ஹாட்ரிக் விக்கெட் வீழ்த்தியிருந்தார். நியூசிலாந்து வீரர் ஒருவர் இச்சாதனையை நிகழ்த்துவது இதுவே முதல் முறை.

ஆஸ்திரேலிய அணி 50 ஓவர்கள் முடிவில் 9 விக்கெட் இழப்பிற்கு 243 ரன்கள் எடுத்தது. நியூசிலாந்து அணியில் போல்ட் 4 விக்கெட் சாய்த்தார். பெர்குசன், நீசம் தலா இரண்டு விக்கெட் சாய்த்தனர்.

பின்னர் 244 ரன்கள் எடுத்தால் வெற்றி என்ற இலக்குடன் களமிறங்கிய நியூசிலாந்து அணியில் கேப்டன் வில்லியம்சனை (40 ரன்) தவிர வேறு யாரும் நிலைத்து நிற்கவில்லை. தொடக்க ஆட்டக்காரர் மார்டின் குப்தில் 20, அனுபவ வீரர் ராஸ் டெய்லர் 30, லாதம் 12 ரன்களில் வெளியேற, அந்த அணி 43.4 ஓவரில் 157 ரன்னுக்கு சுருண்டது. இதையடுத்து ஆஸ்திரேலிய அணி 86 ரன் வித்தியாசத்தில் வெற்றி பெற்றது.

ஆஸ்திரேலிய தரப்பில், அபாரமாக பந்துவீசிய ஸ்டார்க், 5 விக்கெட்டுகளை சாய்த்தார். பேரண்ட்ராப் 2 விக்கெட்டும், கம்மின் ஸ், லியான், ஸ்மித், தலா ஒரு விக்கெட்டும் வீழ்த்தினர்.