ஆஸ்திரேலிய கிரிக்கெட் ஒருநாள் அணியில் தன்னைத் தேர்வு செய்யாதது தனக்கு பெருத்த ஏமாற்றமாக உள்ளது என்று உஸ்மான் கவாஜா வருந்தியுள்ளார்.
இது குறித்து ஈஎஸ்பிஎன் கிரிக் இன்போவுக்காக உஸ்மான் கவாஜா கூறியதாவது:
உள்ளபடியே கூற வேண்டுமெனில் நான் பெருத்த ஏமாற்றமடைந்துள்ளேன். ஜஸ்டின் லாங்கரிடமும் பேசினேன், அணித்தேர்வுக்குழுவினரிடத்திலும் பேசினேன். ஆனால் சில விஷயங்களை நாம் கட்டுப்படுத்த முடியாது. அடுத்த முறை வாய்ப்பு கிடைக்கும் என்று எதிர்பார்க்கிறேன்.
கடந்த 5 அல்லது 6 ஆண்டுகளாக ஒருநாள் கிரிக்கெட்டில் நிறைய ரன்களைக் குவித்தேன், குறிப்பாக உள்நாட்டு கிரிக்கெட் தொடர்களில்.
இப்போதைக்கு அணியில் நான் வருவதை அவர்கள் விரும்பவில்லை, காரணம் என்னவெனில் ‘என்னை அணிக்குள் அவர்கள் விரும்பவில்லை’ என்பதே. என்னுடைய சிகப்புப் பந்து ரெக்கார்டை விட ஒருநாள் கிரிக்கெட்டில்தான் நான் சிறப்பாக ஆடியுள்ளேன். சில வேளைகளில் விஷயங்கள் ஒத்துப்போவதில்லை.
ஜஸ்டின் லாங்கரிடம் பேசினேன், அவர் தெளிவுபடுத்தினார். எனவே நான் தலையைத் தொங்கப்போட்டு கடுமையாக உழைக்க வேண்டும் அவ்வளவே.
குறைந்த ஓவர் கிரிக்கெட்டில் நான் தொடக்க வீர்ராகக் களமிறங்கி வருகிறேன். எனக்கு தொடக்கத்தில் இறங்க மிகவும் பிடிக்கும். அந்த ரோல் எனக்கு மகிழ்ச்சியளிக்கிறது. டெஸ்ட் கிரிக்கெட்டில் 3ம் நிலையில் இறங்க விரும்புகிறேன். எதுஎப்படியிருந்தாலும் டாப் 4ற்குள் இறங்கவே விரும்புகிறேன்.
உலக சாம்பியனான ஆஸ்திரேலிய அணி ஐசிசி சர்வதேச ஒருநாள் தரவரிசைப் பட்டியலில் கடந்த 34 ஆண்டுகளில் இல்லாத அளவுக்கு 6-வது இடத்துக்குச் சரிந்து, பாகிஸ்தானுக்கும் கீழாகச் சென்றுள்ளது.
இங்கிலாந்தில் சுற்றுப்பயணம் செய்து விளையாடிவரும் ஆஸ்திரேலிய அணி முதல் இரு போட்டிகளிலும் மோசமான தோல்வியை அடைந்த காரணத்தால், தரவரிசைப்பட்டியலில் பாதாளத்துக்குச் சென்றது.
-ம் இடம் என்பது ஆஸ்திரேலியாவைப் பொறுத்தவரை பாதாளம் என்றேதான் கூற முடியும். இதற்கு முன் கடைசியாக தரவரிசைப்பட்டியலில் 6-ம் இடத்தில் கடந்த 1984ம் ஆண்டு ஆஸ்திரேலியா இருந்தது அதற்குப்பின் இப்போது சரிந்துள்ளது.
இங்கிலாந்து அணியுடன் இன்னும் 3போட்டிகள் மீதம் இருக்கும் நிலையில், குறைந்தபட்சம் ஒரு போட்டியில்வென்றால்தான் பாகிஸ்தானைக் காட்டிலும் ஒரு இடம் மேலாக உயர்ந்து நிற்க முடியும்.இல்லாவிட்டால் டிம் பெய்ன் தலைமையிலான அணி மோசமான நிலைக்குச் செல்லும்.
கடந்த 2 ஆண்டுகளுக்கு முன் தரவரிசையில் முதலிடத்தில் இருந்த ஆஸ்திரேலிய அணி சமீபத்தில் தென் ஆப்பிரிக்காவுக்கு எதிரான ஒருநாள் தொடரில் 5-0 என்று தோல்வி அடைந்தது. கடைசியாக ஆஸ்திரேலிய அணி 15 ஒருநாள் போட்டிகளில் 13 போட்டிகளில் தோல்வி அடைந்துள்ளது.
ஆஸ்திரேலிய அணி கடைசியாக விளையாடிய 23 ஒருநாள் போட்டிகளில் 9 போட்டிகளில் மட்டுமே வென்றுள்ளது. அதில் 8 போட்டிகளில் கிடைத்த வெற்றி சொந்த நாட்டில் கிடைத்தது. சமீபத்தில் நியூசிலாந்து, இந்தியா, மற்றும் இங்கிலாந்துக்கு எதிரான ஒருநாள் தொடர்களை இழந்துள்ளது. மேலும், சாம்பியன்ஸ் கோப்பையில் லீக் சுற்றோடு வெளியேறியது.