டெஸ்ட் பேட்ஸ்மேன் தரவரிசையில் 912 புள்ளிகளை குவித்துள்ள இந்திய அணி கேப்டன் விராட்கோலி, லாராவை பின்னுக்கு தள்ளி 26-வது இடத்துக்கு முன்னேறி உள்ளார்.
கடைசி டெஸ்ட் போட்டியில் இந்திய அணி கேப்டன் விராட்கோலி முதல் இன்னிங்சில் 54 ரன்னும், 2-வது இன்னிங்சில் 41 ரன்னும் எடுத்தார். இதன் மூலம் அவருக்கு கூடுதலாக 12 புள்ளிகள் கிடைத்தன. இதன் மூலம் 900 புள்ளியில் இருந்த விராட்கோலி 912 புள்ளிகளை எட்டி உள்ளார். இதனால் ஒட்டுமொத்த டெஸ்ட் போட்டியில் 900 புள்ளிகளுக்கு மேல் குவித்த பேட்ஸ்மேன்கள் பட்டியலில் 31-வது இடத்தில் இருந்த விராட்கோலி 26-வது இடத்துக்கு முன்னேறியுள்ளார்.
விராட்கோலி வெஸ்ட்இண்டீஸ் ஜாம்பவான் லாரா (911 புள்ளிகள்), இங்கிலாந்தின் கெவின் பீட்டர்சன் (909 புள்ளிகள்), தென்ஆப்பிரிக்காவின் ஹசிம் அம்லா (907 புள்ளிகள்), வெஸ்ட்இண்டீசின் சந்தர்பால் (901 புள்ளிகள்), ஆஸ்திரேலியாவின் மைக்கேல் கிளார்க் (900 புள்ளிகள்) ஆகியோரை ஒரேநேரத்தில் பின்னுக்கு தள்ளி இந்த முன்னேற்றத்தை கண்டுள்ளார். இந்திய அணியின் முன்னாள் கேப்டன் கவாஸ்கர் 916 புள்ளிகளுடன் 23-வது இடத்தில் இருக்கிறார்.
டெஸ்ட் பேட்ஸ்மேன் ஒட்டுமொத்த தரவரிசையில் ஆஸ்திரேலிய சகாப்தம் டான் பிராட்மேன் 961 புள்ளிகளுடன் தொடர்ந்து முதலிடத்தில் உள்ளார். அதற்கு அடுத்த இடத்தில் ஆஸ்திரேலிய அணியின் கேப்டன் ஸ்டீவன் சுமித் (947 புள்ளிகள்) உள்ளார். இங்கிலாந்து முன்னாள் வீரர் லெனார்ட் ஹூட்டன் (945 புள்ளிகள்) 3-வது இடத்திலும், ஆஸ்திரேலிய முன்னாள் கேப்டன் ரிக்கி பாண்டிங் (942 புள்ளிகள்) 4-வது இடத்திலும், இங்கிலாந்து முன்னாள் வீரர் ஜாக் ஹோப்ஸ் (942 புள்ளிகள்) 5-வது இடத்திலும் உள்ளனர்.