யாருக்காகவும் நிரூபிக்க வேண்டிய அவசியமில்லை: கோலி காட்டம்

யாருக்காகவும் இந்திய அணி நிரூபிக்க வேண்டிய அவசியமில்லை என்று கேப்டன் விராட் கோலி கூறியுள்ளார்.

தொடர் வெற்றிகளைக் குவித்து வரும் இந்திய அணி அடுத்து தென் ஆப்ரிக்காவில் சுற்றுப் பயணம் மேற்கொள்ள உள்ளது.
தென்ஆப்பிரிக்காவுடன் அந்நாட்டு மண்ணில் 3 டெஸ்ட், 6 ஒருநாள் போட்டி மற்றும் மூன்று 20 ஓவர் போட்டிகளில் ஆடுகிறது. டெஸ்ட் தொடர் ஜனவரி 5-ந்தேதி கேப்டவுனில் தொடங்குகிறது.

இந்திய அணி 2017-ம் ஆண்டில் தொடர் வெற்றிகளைக் குவித்து இருந்தாலும் பெரும்பாலானவை இந்திய மண்ணில் பெற்றவையாகும். இதனால் வெளிநாட்டு மைதானங்களில் அதிக வெற்றிகளை குவிக்கவில்லை என்ற விமர்சனம் இந்திய அணியின் மீது தொடர்ந்து வைக்கப்பட்டு வருகிறது. மேலும், தென் ஆப்ரிக்காவில் இந்திய அணி டெஸ்ட் தொடரை வென்று 25 ஆண்டுகள் ஆகியுள்ளது. 

இந்நிலையில், இந்திய அணி மீதான விமர்சனங்கள் குறித்து பதிலளித்த கேப்டன் விராட் கோலி, யாருக்காகவும் நிரூபிக்க வேண்டிய அவசியமில்லை என்று கூறினார். மேலும், “எல்லா வகையான அழுத்தங்களுக்கு நடுவே வெளிநாட்டில் விளையாட வேண்டியுள்ளது. நாங்கள் மக்களுக்குதான் எங்களை நிரூபிக்க விரும்புகிறோம். எதுக்காகவும், எந்தவொரு தனிப்பட்ட நபருக்கும் அல்ல. நாங்கள் தென் ஆப்ரிக்கா செல்வோம். நாட்டிற்காக 100 சதவீதம் பங்களிப்பை செலுத்துவோம். வருகின்ற முடிவை ஏற்றுக் கொள்வோம்.

விளையாடுவது என்பது பேட்ஸ்மேனின் மனநிலை பொறுத்தது தான். அது உள்ளூர் ஆடுகளமாக இருந்தாலும், வெளிநாட்டு மண்ணாக இருந்தாலும் சரி, எல்லாம் ஒன்றுதான். நான் தென் ஆப்ரிக்காவில் ஒரு டெஸ்ட் தொடரில் தான் விளையாடியுள்ளேன். புஜாரா, ரகானே உள்ளிட்ட அனுபவம் வாய்ந்த வீரர்கள் உள்ளனர்.” என்றார்.