12 வருடங்களுக்கு முன்பு தந்தையின் விக்கெட்டை வீழ்த்திய ரவிச்சந்திரன் அஸ்வின், வெஸ்ட் இண்டீஸ் அணியுடனான முதல் டெஸ்ட் போட்டியில் மகனின் விக்கெட்டையும் வீழ்த்தி தந்தை மற்றும் மகன் இருவரின் விக்கெட்டையும் வீழ்த்திய முதல் இந்திய வீரர் என்கிற புதிய வரலாறு படைத்திருக்கிறார் ரவிச்சந்திரன் அஸ்வின்.
வெஸ்ட் இண்டீஸ் சென்று இரண்டு டெஸ்ட் போட்டிகள் மூன்று ஒருநாள் போட்டிகள் மற்றும் ஐந்து டி20 போட்டிகள் கொண்ட தொடரில் இந்திய அணி விளையாடுகிறது. இதில் இரண்டு டெஸ்ட் போட்டிகள் கொண்ட தொடர் முதலாவதாக நடக்கிறது.
முதல் டெஸ்ட் போட்டியின் முதல் இன்னிங்சில் வெஸ்ட் இண்டீஸ் அணி பேட்டிங் இறங்கியது. துவக்க வீரர்கள் கிரெய்க் பிராத்வெயிட் 20 ரன்கள் மற்றும் டாக்நரைன் சந்தர்பால் 12 ரன்கள் அடித்து அஸ்வின் சுழலில் சிக்கி அவுட்டாகினர்.
வரலாறு படைத்த அஸ்வின்
டாக்நரைன் விக்கெட்டை வீழ்த்தியதன் மூலம் ரவிச்சந்திரன் அஸ்வின் புதிய வரலாறு படைத்துள்ளார். அதாவது, 2011 ஆம் ஆண்டு வெஸ்ட் இண்டீஸ் தீவுகளுக்கு இந்திய அணி சுற்றுப்பயணம் மேற்கொண்டிருந்தபோது ரவிச்சந்திரன் அஸ்வின் அணியில் இருந்தார். அப்போது வெஸ்ட் இண்டீஸ் அணியின் ஜாம்பவான் சிவ்நரைன் சந்தர்ப்பால் விக்கெட்டை வீழ்த்தினார்.
இந்த வருடம் மீண்டும் வெஸ்ட் இண்டீஸ் வந்திருக்கும்பொழுது அணியில் சிவ்நரைன் சந்தர்ப்பால் பால் மகன் டாக்நரைன் சந்தர்ப்பால் பிளேயிங் லெவனில் இடம்பெற்றிருக்கிறார். இவரது விக்கெட்டை ரவிச்சந்திரன் அஸ்வின் வீழ்த்தியுள்ளார்.
டெஸ்ட் கிரிக்கெட் வரலாற்றில் தந்தை மற்றும் மகன் இருவரின் விக்கெட்டையும் வீழ்த்திய ஒரே இந்திய பவுலர் என்கிற வரலாற்றை தன் வசம் கொண்டிருக்கிறார் ரவிச்சந்திரன் அஸ்வின்.
போட்டி சுருக்கம்
உணவு இடைவேளையின்போது 68 ரன்களுக்கு நான்கு விக்கெடுகளை இழந்திருந்த வெஸ்ட் இண்டீஸ் அணி 100 ரன்களை எட்ட உதவினார் அறிமுக வீரர் ஆலிக் அத்தனஸ். இவர் 47 ரன்களுக்கு அவுட்டாகி வெளியேறினார். ஜேசன் ஹோல்டர் 19 ரன்கள் அடித்துக்கொடுத்தார். கான்வெல் இறுதிவரை அவுட்டாகாமல் 18 ரன்கள் அடித்திருந்தார்.
அஸ்வின் 5 விக்கெட்டுகள், ஜடேஜா 3 விக்கெட்டுகள் வீழ்த்தினர். வெஸ்ட் இண்டீஸ் அணி 150 ரன்களுக்கு ஆல் அவுட் ஆனது.