ஐபிஎல் கிரிக்கெட் தொடரில் பங்கேற்கும் அணிகளில் ஒன்று சென்னை சூப்பர் கிங்ஸ் அணி. அந்த அணியில் இடம் பெற்றுள்ள வீரர் டுவைன் பிராவோ. இவர் கிரிக்கெட் களத்திற்கு வெளியே பாடல்கள் பாடி ஆல்பமாக வெளியிட்டு வருகிறார். தமிழ் சினிமா ஒன்றில் நடனமும் ஆடியுள்ளார்.
இவர் வெளியிட்ட சாம்பியன் என்ற பாடல் கடந்த 2016 இல் நடந்த டி-20 உலகக்கோப்பை கிரிக்கெட் தொடருக்கான பாடலாக பயன்படுத்தப்பட்டது. தற்போது பிராவோ, சிஎஸ்கே கேப்டன் தோனிக்காக ஒரு பாடல் ஒன்றை பாடியுள்ளார்.
இந்த பாடலை சமீபத்தில் சமூக வலைதளத்தில் பாடி காட்டி அசத்தினார் பிராவோ. அதில், “எம்.எஸ் தோனி.. எம்.எஸ் தோனி.. எம்.எஸ் தோனி.. நம்பர் -7 ராஞ்சி சவுட்டிங் தோனி. இந்தியா சவுட்டிங் மஹி.. சென்னை சவுட்டிங் தல… இந்த பாடல் சமூக வலைதளத்தில் தற்போது வைரலானது.
இந்த பாடலை ஏன் பாடினேன் என பிராவோ தற்போது தெரிவித்துள்ளார். மேலும் தோனியின் கிரிக்கெட் பயணம் எப்படிப்பட்ட தாக்கத்தை ஏற்படுத்தியது என்றும், ரோஹித் ஷர்மா, விராட் கோலி உள்ளிட்ட வீரர்களை நட்சத்திரங்களாக ஜொலிக்க வைத்ததில் தோனி பங்கு என்ன என்பதையும் பிராவோ தெரிவித்துள்ளார்.
இதுகுறித்து பிராவோ கூறுகையில், “மஹி சாங்கை நான் இன்னும் முழுமையா க பாடி முடிக்கவில்லை. இசை மற்றும் இன்னும் சில பாடல் வரிகளை முழுமை செய்ய வேண்டும். ஒரு தனிப்பட்ட வீரருக்காக இதுவரை யாரும் பாடல் மூலம் மரியாதை செய்யவில்லை அதனால் தான் எனக்கு இந்த ஐடியா தோன்றியது. தோனி தனது கிரிக்கெட் பயணத்தின் முடிவுக்கு வந்துவிட்டார் அதனால் அவருக்காக எதாவது செய்ய வேண்டும் என நினைத்தேன். தோனியின் கெரியர் மிகவும் சிறப்பானது. அவர் தனிப்பட்ட முறையில் எனக்கும் இன்னும் சில வீரர்களின் முன்னேற்றத்துக்கு உதவியுள்ளார்.
கிரிக்கெட் வீரர்களான ரோஹித் ஷர்மா, ஹர்திக் பாண்டியா, விராட் கோலி போன்ற வீரர்கள் பேட்டி அளிக்கும் போது பார்த்திருக்கிறோம். அவர்களின் கிரிக்கெட் வாழ்வை மேம்படுத்த தோனி எப்படி உதவியுள்ளார் என. பல கிரிக்கெட் வீரர்களுக்கு தோனி அதிக வாய்ப்புகள் அளித்துள்ளார் அதே நேரம் நாட்டுக்காக பல கோப்பைகளையும் தோனி வென்றுள்ளார்.
அதனால் அவருக்காக எதாவது ஸ்பெஷலாக செய்ய நினைத்தேன். அதற்காக தான் நம்பர்-7 என அந்த பாடலுக்கு பெயர் வைத்தேன். அது தான் தோனியின் நம்பர். அந்த நம்பர் அவருக்கு மிகவும் சிறப்பானது. அடிக்கடி நான் அவரிடம் கேட்பதுண்டு, எனது அணி நிர்வாகம் என் மீது வைக்காத அளவு நம்பிக்கை கூட ஏன் நீங்கள் வைத்துள்ளீர்கள் என. அதற்கு தோனி எனது திறமையை மதிப்பதாக தெரிவித்தார். உலகில் உள்ள சிறந்த கேப்டன்களில் தோனியும் ஒருவர் என்பதில் எவ்வித சந்தேகமும் இல்லை.