ஐபிஎல் தொடருக்காக பயிற்சியை துவங்கியுள்ளார் மகேந்திர சிங் தோனி. இணையத்தை கலக்கிய வைரல் வீடியோ.
வருகிற மார்ச் மாதம் மூன்றாவது வாரம் 2023ஆம் ஆண்டுக்கான ஐபிஎல் தொடர் துவங்கவிருக்கிறது. மே மாதம் மூன்றாவது வாரம் வரை நடைபெறும் இந்த தொடருக்கான ஏலம் கடந்த டிசம்பர் 21ஆம் தேதி கொச்சியில் நடைபெற்றது. மினி ஏலம் பல திருப்புமுனைகளையும் பல ஆச்சரியங்களையும் கொண்டதாக அமைந்தது.
குறிப்பாக, சென்னை சூப்பர் கிங்ஸ் அணிக்கு 16.25 கோடி கொடுத்து பென் ஸ்டோக்ஸ் எடுக்கப்பட்டார். அஜிங்க்யா ரஹானே, கைல் ஜாமிஷன் உள்ளிட்டோரும் குறிப்பிடத்தக்க விதமாக ஏலத்தில் எடுக்கப்பட்டனர். பென் ஸ்டோக்ஸ் எடுக்கப்பட்டதற்கு தோனி நல்ல வரவேற்பு கொடுத்ததாக, அணியின் தலைமை செயல் அதிகாரி காசி விஸ்வநாதன் தெரிவித்தார்.
நான்கு முறை சாம்பியன் பட்டம் வென்ற சிஎஸ்கே அணிக்கு கடந்த ஐபிஎல் சீசன் எதிர்பார்த்தவாறு அமையவில்லை. துவக்கத்தில் கேப்டன் பொறுப்பு ஜடேஜாவிற்கு கொடுக்கப்பட்டது. முதல் 8 போட்டிகளில் 6 தோல்விகள் பெற்றதால் சிஎஸ்கே அணி பின்னடைவை சந்தித்ததையடுத்து கேப்டன் பொறுப்பிலிருந்து ஜடேஜா விலகினார்.
மீதமிருந்த போட்டிகளுக்கு தோனி மீண்டும் கேப்டன் பொறுப்பேற்று விளையாடினார். ஆனாலும் சிஎஸ்கே அணி வெறும் 4 வெற்றிகள் மட்டுமே பெற்று புள்ளிப்பட்டியலில் 9வது இடத்தில் இருந்ததால், தொடரிலிருந்து வெளியேறியது.
வருகிற 2023 சீசனுடன் தோனி ஐபிஎல் போட்டிகளில் இருந்து ஓய்வு பெறுவதாக தகவல்கள் வருகிறது. ஆகையால், சிஎஸ்கே அணிக்கு சாம்பியன் பட்டத்தை வென்றுகொடுத்துவிட்டு செல்வார் என்கிற எதிர்பார்ப்பு ரசிகர்கள் மற்றும் அணி நிர்வாகம் மத்தியில் அதிகமாகவே உள்ளது. தோனியும் அதே மனநிலையில் தான் இருப்பதாக தெரிகிறது.
ஏனெனில் ஐபிஎல் துவங்க இன்னும் சரியாக 2 மாதங்கள் இருக்கிறது. அதற்குள் இப்போதே தோனி பயிற்சியை துவங்கிவிட்டார். அதன் போட்டோக்கள் மற்றும் வீடியோக்கள் வெளியாகி இணையத்தை கலக்கி வருகிறது.
இந்த வருடம் சிஎஸ்கே அணிக்கு எவ்வித குழப்பமும் இன்றி தோனி தான் முழுவதுமாக கேப்டனாக இருப்பார் என அணி நிர்வாகம் அறிவித்துவிட்டது.