டெஸ்ட் போட்டியில் விரைவாக ஆட்டமிழந்ததால், தனக்குத்தானே தண்டனை கொடுத்திருக்கிறார், ஆஸ்திரேலிய கிரிக்கெட் வீரர் ஸ்டீவ் ஸ்மித்.
பாகிஸ்தான் கிரிக்கெட் அணி, ஆஸ்திரேலியாவில் சுற்றுப்பயணம் செய்து கிரிக்கெட் விளையாடி வருகிறது. இரு அணிகளுக்கு இடையிலான முதல் டெஸ்ட் போட்டியில் ஆஸ்திரேலியா வெற்றி பெற்றது. இந்தப் போட்டியில் ஸ்டீவ் ஸ்மித், பாகிஸ்தான் ஸ்பின்னர் யாசிர் ஷா பந்துவீச்சில் ஆட்டமிழந்தார். அவர் பந்துவீச்சில் 7 முறை ஆட்டமிழந்ததைக் குறிப்பிடும் விதமாக யாசிர் ஷா, கைவிரல்களை காட்டினார். இந்தப் போட்டி முடிந்ததும் பிரிஸ்பேன், கப்பா மைதானத்தில் இருந்து 3 கி.மீ தூரம் ஓடியே, தங்கியிருந்த ஓட்டலுக்குச் சென்றார் ஸ்மித்.
’ஏன் இந்த ஓட்டம்?’ என்று அவரிடம் கேட்டபோது, ‘’அதிகமாக ரன்கள் எடுக்கவில்லை என்றால் எனக்கு நானே எப்போதும் கொடுத்துக் கொள்ளும் தண்டனை இது. நான் சதமடித்தால், அன்று இரவு சாக்கலேட் பாருக்கு சென்று கொண்டாடுவேன். அதிக ரன்கள் அடிக்கவில்லை என்றால், ஜிம்முக்குச் சென்று அதிகமாக உடற்பயிற்சி செய்வேன் அல்லது சில கி.மீ ஓடி எனக்கு நானே தண்டனை கொடுத்துக்கொள்வேன்’’ என்று தெரிவித்துள்ளார்.
பாகிஸ்தான் கிரிக்கெட் அணி ஆஸ்திரேலியாவில் சுற்றுப்பயணம் செய்து விளையாடி வருகிறது.
இரு அணிகள் இடையேயான 3 போட்டிக்கொண்ட 20 ஓவர் தொடரை ஆஸ்திரேலியா 2-0 என்ற கணக்கில் கைப்பற்றியது. 2 டெஸ்ட் தொடரில் பிரிஸ்பேனில் நடந்த முதல் டெஸ்டில் ஆஸ்திரேலியா இன்னிங்ஸ் மற்றும் 5 ரன் வித்தியாசத்தில் வெற்றி பெற்றது.
ஆஸ்திரேலியா- பாகிஸ்தான் அணிகள் மோதும் 2-வது மற்றும் கடைசி டெஸ்ட் போட்டி அடிலெய்டுவில் நாளை (29-ந்தேதி) தொடங்குகிறது.
இந்த டெஸ்டில் பாகிஸ்தானை மீண்டும் வீழ்த்தி ஆஸ்திரேலியா தொடரை வெல்ல வாய்ப்பு உள்ளது.
பிரிஸ்பேன் டெஸ்டில் மார்கஸ், வார்னர் சதம் அடித்து முத்திரை பதித்தனர். பந்து வீச்சில் ஸ்டார்க், (7 விக்கெட்), ஹாசல்வுட் (6 விக்கெட்) கும்மின்ஸ் (5 விக்கெட்) ஆகியோர் சிறப்பான நிலையில் உள்ளனர்.
பாகிஸ்தான் அணி ஆஸ்திரேலியாவுக்கு பதிலடி கொடுத்து தொடரை சமன் செய்யும் ஆர்வத்தில் உள்ளது. ஆனால் அந்த அணி பேட்டிங் மற்றும் பந்து வீச்சில் பலவீனமாகவே இருக்கிறது, பாபர் ஆசம், முகமது ரிஸ்வான் ஆகியோர் மட்டுமே சிறப்பான ஆட்டத்தை வெளிப்படுத்தி இருந்தனர்.
இந்த டெஸ்டில் வெற்றி பெற்றால் ஆஸ்திரேலியா ஐ.சி.சி. உலக சாம்பியன்ஷிப் பட்டியலில் 176 புள்ளிகளை எட்டும். பாகிஸ்தான் அணி இதுவரை புள்ளிகள் எதுவும் பெறவில்லை. அந்த அணி வெற்றி பெற்றாலோ அல்லது டிரா செய்தாலோ மட்டுமே புள்ளிகளை பெறும். வெற்றி பெற்றால் 60 புள்ளியும் டிரா செய்தால் 20 புள்ளியும் கிடைக்கும்.