பரபரப்பான உலக கோப்பை லீக் போட்டியில்முகமது ஷமி ‘ஹாட்ரிக்’ சாதனை படைக்க, இந்திய அணி 11 ரன்கள் வித்தியாசத்தில் ‘திரில்’ வெற்றி பெற்றது. கடைசி ஓவர் வரை நெருக்கடி கொடுத்த ஆப்கானிஸ்தான் போராட்டம் வீணானது.
இங்கிலாந்தில் 12வது உலக கோப்பை கிரிக்கெட் தொடர் நடக்கிறது. சவுத்தாம்ப்டனில் நடந்த லீக் போட்டியில் இந்தியா, ஆப்கானிஸ்தான் அணிகள் மோதின. ‘டாஸ்’ வென்ற இந்திய அணி கேப்டன் கோஹ்லி பேட்டிங் தேர்வு செய்தார்.
ரோகித் ஏமாற்றம்
இந்திய அணிக்கு ரோகித் சர்மா, லோகேஷ் ராகுல் ஜோடி துவக்கம் கொடுத்தது. தடுமாறிய ரோகித் 10 பந்தில் 1 ரன் மட்டும் எடுத்து, முஜீப் பந்தில் போல்டானார்.ராகுல் (30), ‘ரிவர்ஸ் சுவீப்’ அடிக்க ஆசைப்பட்டு அவுட்டானார்.
கோஹ்லி அரைசதம்
விஜய் சங்கர் 29 ரன் எடுத்தார். ஒருநாள் அரங்கில் 52வது அரைசதம்அடித்தகோஹ்லி 67 ரன்னுக்கு வீழ்ந்தார். தோனி, கேதர் ஜாதவ் இருவரும் மந்தமான ஆட்டத்தை வெளிப்படுத்தினர்.பவுண்டரி, சிக்சர் என எதிர்பார்த்து வந்த ரசிகர்கள் பெரும் ஏமாற்றம் அடைந்தனர்.45.5 ஓவரில் தான் இப்போட்டியின் முதல் சிக்சரைஅப்தாப் பந்தில் அடித்தார் கேதர் ஜாதவ்.
தோனி (28), பாண்ட்யா (7) அடுத்தடுத்து அவுட்டாகினர். 6வது அரைசதம் அடித்த கேதர் ஜாதவ், 52 ரன்னுக்கு அவுட்டானார். முகமது ஷமி 1 ரன் எடுத்தார். இந்திய அணி 50 ஓவரில் 8 விக்கெட்டுக்கு 224 ரன்கள் மட்டும் எடுத்தது. பும்ரா (1), குல்தீப் (1) அவுட்டாகாமல் இருந்தனர்.
பும்ரா நம்பிக்கை
எளிய இலக்கைத் துரத்திய ஆப்கானிஸ்தான் அணிக்கு ஹஸ்ரத்துல்லா(10), கேப்டன் குல்பதீன் ஜோடி துவக்கம் கொடுத்தது. ஹஸ்ரத்துல்லா (10), முகமது ஷமி பந்தில் போல்டானார். குல்பதீன் 27 ரன் எடுத்தார். பும்ராவின் ஒரே ஓவரில் ரஹ்மத் ஷா (36), ஹஸ்மதுல்லா (21) வீழ்ந்தனர்.ஜட்ரன் (21) கைவிட்டார். சகால் சுழலில் ரஷித் கான் (14) வெளியேறினார். கடைசி நேரத்தில் முகமது நபி அனுபவ ஆட்டத்தை வெளிப்படுத்த, இந்திய ரசிகர்கள் அதிர்ச்சி அடைந்தனர்.
சபாஷ் ஷமி
கடைசி ஓவரில் வெற்றிக்கு 16 ரன் தேவைப்பட்டன. ஷமி வீசிய இந்த ஓவரின் முதல் பந்தில் பவுண்டரி அடித்தார் நபி. 2வது பந்தில் ரன் எடுக்காத நபி (52), 3வது பந்தில் அவுட்டாக, இந்தியா பக்கம் திரும்பியது வெற்றி. அடுத்து அப்தாப் (0) போல்டானார். 5வது பந்தில் முஜீப் (0) போல்டாக, ஷமி ‘ஹாட்ரிக்’ சாதனை படைத்தார். ஆப்கானிஸ்தான் 49.5 ஓவரில் 213 ரன்னுக்கு சுருண்டது. இந்திய அணி 11 ரன்கள் வித்தியாசத்தில் ‘திரில்’ வெற்றி பெற்றது. ஷமி 4, பும்ரா, சகால், பாண்ட்யா தலா 2 விக்கெட் சாய்த்தனர்.