இந்தியா உலகக்கோப்பை அணிக்கு புதிய வலைப்பயிற்சி பந்து வீச்சாளராக நவ்தீப் சைனியை இங்கிலாந்து அனுப்பியுள்ளது பிசிசிஐ.
இங்கிலாந்தில் நடைபெற்று வரும் ஒருநாள் போட்டிக்கான உலக கோப்பையில் இந்திய அணி இதுவரை ஆடிய ஐந்து ஒருநாள் போட்டிகளில் நான்கு வெற்றிகளை பெற்றுள்ளது. இதில் ஒரு போட்டி மழை காரணமாக ரத்தானது. இந்திய அணியின் பேட்ஸ்மேன்கள் மற்றும் பந்துவீச்சாளர்கள் இருவரும் தங்களது துறைகளிலும் சிறப்பாக செயல்பட்டு வருகின்றனர். இந்திய அணிக்கு நடுவரிசை பேட்டிங் மட்டுமே சற்று கேள்விக்குறியாக இன்றளவும் இருந்துவருகிறது. இதை ஆப்கானிஸ்தானுக்கு எதிரான போட்டிகளிலும் நம்மால் காண முடிந்தது.
மேலும் துவக்க வீரர் ஷிகர் தவான் ஆஸ்திரேலிய அணிக்கு எதிரான போட்டியில் தனது கட்டை விரலில் காயம் ஏற்பட்டு உலக கோப்பை தொடரில் இருந்து விலகினார். அவருக்கு பதிலாக இளம் வீரர் ரிஷப் பண்ட் இந்திய அணியில் சேர்க்கப்பட்டார். மேலும் பாகிஸ்தானுக்கு எதிரான போட்டியில் புவனேஷ்வர் குமாருக்கு காலில் காயம் ஏற்பட்டது. இதனால் ஆப்கானிஸ்தானுக்கு எதிரான போட்டியில் அவருக்கு ஓய்வு அளிக்கப்பட்டு முகமது சமி உள்ளே எடுத்து வரப்பட்டது. அந்த போட்டியில் சமி சிறப்பாக செயல்பட்டார்.
பும்ராவும் அவ்வபோது கணுக்கால் காயம் காரணமாக அவதிப்பட்டு வருகிறார். பயிற்சி ஆட்டத்தின் போது விஜய் ஷங்கரும் காலில் காயம் ஏற்பட்டு அவ்வபோது பயிற்சிகளை தவிர்த்து வருகிறார். முகமது சமியும் 100% உடல் தகுதி கொண்டவர் அல்ல.
வீரர்கள் குறிப்பாக வேகப்பந்து வீச்சாளர்கள் காயத்தினால் அவதிப்பட்டு வரும் நிலையில் பயிற்சியின் போது சற்று ஓய்வெடுக்க, வலைப்பயிற்சியில் பந்து வீசுவதற்காக பிசிசிஐ நவ்தீப் சைனியை தற்போது இங்கிலாந்து அனுப்பியுள்ளது. இவர் ஏற்கனவே உலகக் கோப்பை ரிசர்வ் வரிசையில் இருக்கிறார். ஏதேனும் ஒரு வேகப்பந்து வீச்சாளர்கள் காயம் காரணமாக தொடரில் இருந்து விலக நேர்ந்தால் இவருக்கு வாய்ப்பு கிடைக்கும்.