இந்த வீரரை பார்த்தாலே ஆஸ்திரேலிய வீரர்கள் நடுங்குவார்கள் ; சுரேஷ் ரெய்னா ஓபன் டாக்
இந்திய கிரிக்கெட் வீரர் சுரேஷ் ரெய்னா, ஆஸ்திரேலியர்களை ஆட்டம் காண வைத்த இந்திய வீரர் குறித்து பேசியுள்ளார்.
இந்திய கிரிக்கெட் வீரர் சுரேஷ் ரெய்னா. இவர் இந்திய அணியில் இருந்த மிகச்சிறந்த சுழற்பந்துவீச்சாளர்களில் ஒருவர் ஹர்பஜன் சிங் என்றும் அவருடன் ஆஸ்திரேலிய வீரர்கள் வம்பு இழுக்கவே யோசிப்பார்கள் என்றும் தெரிவித்துள்ளார். இந்திய கிரிக்கெட் அணியில் கடந்த 1998 இல் அறிமுகமானவர் ஹர்பஜன் சிங். இவர் ஆஸ்திரேலிய வீரர்களான ரிக்கி பாண்டிங், ஆண்டிரு சைமண்ட்ஸ் ஆகியோருடன் நேருக்கு நேர் மோதலில் ஈடுபட்டதும் தெரிந்தது தான்.
கடந்த 2000 -01 ஆம் ஆண்டில், இந்தியாவில் நடந்த பார்டர் – கவாஸ்கர் டிராபி தொடரில் ஹர்பஜன் சிங், ஹாட்ரிக் உட்பட மொத்தமாக 32 விக்கெட்டுகளை சாய்த்து இந்திய அணி அந்த தொடரை 2-1 என கைப்பற்ற உதவினார். தொடர்ந்து கடந்த 2007 டி-20 உலகக்கோப்பை, 2011 இல் நடந்த 50 ஓவர் உலகக்கோப்பை கிரிக்கெட் தொடர் என தோனி தலைமையிலும் ஹர்பஜன் சிங் தனது அசத்தலான பவுலிங்கை தொடர்ந்து வெளிப்படுத்தினார்.
இந்நிலையில் இர்பான் பதானுடன் பேசிய இந்திய வீரர் சுரேஷ் ரெய்னா, ஹர்பஜன் சிங்கை கண்டாலே ஆஸ்திரேலிய வீரர்கள் நடுங்குவார்கள் என்றார். இதுகுறித்து ரெய்னா கூறுகையில் ,“கிரிக்கெட் ஜாம்பாவான்களில் ஒருவர் ஹர்பஜன் சிங். 100 டெஸ்ட் போட்டிகளுக்கு மேல் பங்கேற்றுள்ளார். அவர் மிகப்பெரிய போராளி என்றும், ஆஸ்திரேலியாவில் போட்டியில் வெற்றிகளை பெற்றுக்கொடுத்துள்ளார். ஹர்பஜன் சிங்கிடம் இருந்து ஆஸ்திரேலியர்கள் விலகியே இருப்பார்கள்” என்றார்.
இதேபோல ஹர்பஜன் சிங் குறித்து இர்பான் பதான் கூறுகையில், “ஹர்பஜன் சிங் ஒருமுறை என்னிடம் வந்து நான் ஹர்பஜன் போல உணரவில்லை என்றும் மைக்கேல் ஜாக்சன் போல உணர்கிறேன் என்றும் தெரிவித்தார். அதற்கு காரணம் கடந்த 2008 இல் நடந்த தொடரில் மீடியா அவரை அவ்வளவு தீவிரமாக பின்பற்றியது. மைதானம் முதல் ஹோட்டல் வரை அவரைத் தான் பின் தொடர்ந்தனர்” என்றார்.