இந்திய வீரர்களின் வருடாந்திர ஒப்பந்தபட்டியலை இறுதிசெய்து வெளியிட்டுள்ளது பிசிசிஐ. கடந்த வருடம் 27 வீரர்கள், ஆனால் இந்த வருடம் 26 வீரர்கள் மட்டுமே ஒப்பந்தம் செய்யப்பட்டுள்ளனர்.
பிசிசிஐ இந்திய வீரர்களுக்கான ஒப்பந்தத்தை நான்கு பிரிவுகளின் அடிப்படையில் வருடாவருடம் செய்து வருகிறது. ஏ-பிளஸ் பிரிவில் ஒப்பந்தம் செய்யப்படும் வீரர்களுக்கு 7 கோடியும், ஏ பிரிவு வீரர்களுக்கு 5 கோடியும், பி பிரிவு வீரர்களுக்கு 3 கோடியும், கடைசியாக சி பிரிவு வீரர்களுக்கு ஒரு கோடியும் ஒப்பந்தத் தொகையாக கொடுக்கப்படும்.
2022ஆம் ஆண்டு மொத்தம் 27 வீரர்களை பிசிசிஐ ஒப்பந்தம் செய்திருந்தது. இந்த வருடம் 26 வீரர்களை ஒப்பந்தம் செய்திருக்கிறது. ஏ-பிளஸ் பிரிவில் நான்கு வீரர்கள் ஒப்பந்தம் செய்யப்பட்டிருக்கின்றனர். ஏ பிரிவில் 5 வீரர்கள், பி பிரிவில் ஆறு வீரர்கள் மற்றும் சி பிரிவில் 11 வீரர்கள் ஒப்பந்தம் செய்யப்பட்டிருக்கின்றனர்.
ஒப்பந்தத்தில் முன்னேற்றம் கண்ட இந்திய வீரர்கள்:
கடந்த வருடம் ஏ பிரிவில் இடம் பெற்றிருந்த ஜடேஜா இந்த வருடம் ஏ-பிளஸ் பிரிவிற்கு ஒப்பந்தம் செய்யப்பட்டுள்ளார். பி பிரிவில் இருந்த அக்சர் பட்டேல் ஏ பிரிவிற்கு ஒப்பந்தமாகியுள்ளார். சி பிரிவில் இருந்த ஷுப்மன் கில், சூரியகுமார் யாதவ் ஆகியோர் இந்தாண்டு பி பிரிவிற்கும், ஹர்திக் பாண்டியா நேரடியாக ஏ பிரிவிற்கும் ஒப்பந்தம் செய்யப்பட்டுள்ளனர்.
இஷான் கிஷன், தீபக் ஹூடா, சஞ்சு சாம்சன், குல்தீப் யாதவ், அரஷ்தீப் சிங், கேஎஸ் பரத் ஆகியோர் முதல் முறையாக ஒப்பந்தம் செய்யப்பட்டிருக்கின்றனர். அவர்களுக்கு சி பிரிவு ஒப்பந்தம் கொடுக்கப்பட்டிருக்கிறது.
பிரிவு வாரியாக ஒப்பந்தம் செய்யப்பட்டுள்ள இந்திய வீரர்கள்
ஏ- பிளஸ் பிரிவு – விராட் கோலி, ரோகித் சர்மா, ஜஸ்பிரித் பும்ரா, ரவீந்திர ஜடேஜா.
ஏ பிரிவு – ஹர்திக் பாண்டியா, ஆர் அஸ்வின், முகமது சமி, ரிஷப் பண்ட், அக்சர் பட்டேல்
பி பிரிவு – புஜாரா, கேஎல் ராகுல், ஷ்ரேயாஸ் ஐயர், முகமது சிராஜ், சூரியகுமார் யாதவ், சுப்மன் கில்
சி பிரிவு – உமேஷ் யாதவ், ஷிக்கர் தவான், சர்துல் தாக்கூர், இஷான் கிஷன், சஞ்சு சாம்சன், குல்தீப் யாதவ், தீபக் ஹூடா, யுஸ்வேந்திர சகல், வாஷிங்டன் சுந்தர், அர்ஷ்தீப் சிங், கேஎஸ் பரத்.