ஆசிய கோப்பை கிரிக்கெட் தொடரில் இலங்கை அணிக்கு எதிரான இன்றைய போட்டியில் முதலில் பேட்டிங் செய்த இந்திய அணி 8 விக்கெட் இழப்பிற்கு 173 ரன்கள் குவித்துள்ளது.
ஆசிய கோப்பை கிரிக்கெட் தொடர் சூப்பர் 4 சுற்றின் 3வது போட்டியில் இந்திய அணியும், இலங்கை அணியும் மோதி வருகின்றன.
துபாய் சர்வதேச மைதானத்தில் நடைபெற்று வரும் இந்த போட்டியில் டாஸ் வென்ற இலங்கை அணி முதலில் பந்துவீச்சை தேர்வு செய்தது.
இதனையடுத்து முதலில் பேட்டிங் செய்ய களமிறங்கிய இந்திய அணிக்கு கே.எல் ராகுல் 6 ரன்னில் விக்கெட்டை இழந்து ஏமாற்றம் கொடுத்தார், மூன்றாவது விக்கெட்டிற்கு களமிறங்கிய விராட் கோலி டக் அவுட்டானார்.
இதன்பின் களமிறங்கிய சூர்யகுமார் யாதவுடன் கூட்டணி சேர்ந்த ரோஹித் சர்மா பொறுப்பான ஆட்டத்தை வெளிப்படுத்தினார். 41 பந்துகளில் 4 சிக்ஸர் மற்றும் 5 பவுண்டரிகளுடன் 72 ரன்கள் எடுத்த போது ரோஹித் சர்மா விக்கெட்டை இழந்தார், சூர்யகுமார் யாதவ் 34 ரன்கள் எடுத்த போது விக்கெட்டை இழந்தார்.
இதன்பின் களத்திற்கு வந்த ஹர்திக் பாண்டியா மற்றும் ரிஷப் பண்ட் ஆகியொர் தலா 17 ரன்களில் விக்கெட்டை இழந்தனர். அடுத்ததாக களத்திற்கு வந்த தீபக் ஹூடா 3 ரன்னில் வெளியேறினார், புவனேஷ்வர் குமார் டக் அவுட்டானர். கடைசி நேரத்தில் ரவிச்சந்திர அஸ்வின் 7 பந்துகளில் 15 ரன்கள் எடுத்து கொடுத்ததன் மூலம் 20 ஓவர்கள் முடிவில் 8 விக்கெட்டுகளை இழந்த இந்திய அணி 173 ரன்கள் எடுத்துள்ளது.
இலங்கை அணி சார்பில் தில்சன் 3 விக்கெட்டுகளையும், தசுன் ஷனாகா மற்றும் கருணாரத்னே ஆகியோர் தலா 2 விக்கெட்டுகளையும் கைப்பற்றினர்.