ருத்ரதாண்டவம் ஆடிய டிவில்லியர்ஸ்; கொல்கத்தா அணிக்கு கடின இலக்கு
கொல்கத்தா நைட் ரைடர்ஸ் அணிக்கு எதிரான இன்றைய போட்டியில் முதலில் பேட்டிங் செய்த பெங்களூர் அணி 2 விக்கெட் இழப்பிற்கு 194 ரன்கள் எடுத்துள்ளது.
ஐபிஎல் டி.20 தொடரின் இன்றைய போட்டியில் விராட் கோஹ்லி தலைமையிலான ராயல் சேலஞ்சர்ஸ் பெங்களூர் அணியும், தினேஷ் கார்த்திக் தலைமையிலான கொல்கத்தா நைட் ரைடர்ஸ் அணியும் மோதி வருகின்றன.
துபாய் ஷார்ஜா மைதானத்தில் நடைபெற்று வரும் இந்த போட்டியில் டாஸ் வென்ற பெங்களூர் அணியின் கேப்டன் விராட் கோஹ்லி முதலில் பேட்டிங்கை தேர்வு செய்தார்.
இதனையடுத்து முதலில் பேட்டிங் செய்ய களமிறங்கிய பெங்களூர் அணிக்கு அந்த அணியின் துவக்க வீரரான படிக்கல் 32 ரன்களும், மற்றொரு துவக்க வீரரான ஆரோன் பின்ச் 47 ரன்களும் எடுத்து கொடுத்து சிறப்பான துவக்கம் கொடுத்தனர்.
இதன்பின் மூன்றாவது விக்கெட்டுக்கு ஜோடி சேர்ந்த விராட் கோஹ்லி – டிவில்லியர்ஸ் கூட்டணி கொல்கத்தா அணியின் பந்துவீச்சை சிதறடித்து மளமளவென ரன் குவித்தது. விராட் கோஹ்லியே பொறுமையாக விளையாடிய போது கடைசி நான்கு ஓவர்களில் காட்டடி அடித்த ஏ.பி டிவில்லியர்ஸ் 33 பந்துகளில் 6 சிக்ஸர் மற்றும் 5 பவுண்டரியுடன் 73 ரன்கள் குவித்ததன் மூலம் நிர்ணயிக்கப்பட்ட 20 ஓவர்கள் முடிவில் 2 விக்கெட்டுகளை இழந்த பெங்களூர் அணி 194 ரன்கள் எடுத்துள்ளது.
கொல்கத்தா நைட் ரைடர்ஸ் அணி சார்பில் ஆண்ட்ரியூ ரசல் மற்றும் பிரசீத் கிருஷ்ணா தலா ஒரு விக்கெட்டை கைப்பற்றினர்.