டிராவிட் தலைமையில் இந்திய அணி கடந்த 2007-ம் ஆண்டு இங்கிலாந்து சென்று 3 போட்டிகள் கொண்ட டெஸ்ட் தொடரை 1-0 என்று கணக்கில் வென்று வரலாற்றுச் சாதனை படைத்தது. அதில் வெற்றி பெற்ற டெஸ்ட் போட்டியில் 2 இன்னிங்ஸ்களிலும் சேர்த்து 7 விக்கெட்டுகளை வீழ்த்தி ஆர்.பி.சிங் வெற்றிக்கியக் காரணமாக அமைந்தார் என்பதை மறுப்பதற்கில்லை. 2-வது இன்னிங்ஸில் மைக்கேன் வான், கெவின் பீட்டர்ஸன், பால் காலிங்வுட், இயான் பெல், மான்டி பனேசர் ஆகியோரை வீழ்த்தினார் என்பது குறிப்பிடத்தக்கது.
ஆர்.பி.சிங் ட்விட்டரில் வெளியிட்டுள்ள கடிதத்தில் கூறியுள்ளதாவது:
நான் இன்றுடன் கிரிக்கெட்டில் இருந்து ஓய்வு பெறுகிறேன். 13 ஆண்டுகளுக்கு முன் கடந்த 2005-ம் ஆண்டு செப்டம்பர் 4-ம் தேதி நான் இந்திய அணிக்காக முதன்முதலில் விளையாடத் தொடங்கினேன்.
என் வாழ்வில் எப்போதும் நினைவில் இருப்பது, ராகுல் டிராவிட் தலைமையில் இங்கிலாந்தில் 2007-ம் ஆண்டு டெஸ்ட் தொடரில் விளையாடினேன். அப்போது, இங்கிலாந்துக்கு எதிராக 1-0 என்று டெஸ்ட் தொடரை கைப்பற்றினோம். வெற்றி பெற்ற அந்த டெஸ்ட் போட்டியில் நான் 117 ரன்கள் கொடுத்து 7 விக்கெட்டுகளை வீழ்த்தியதை என்னால் மறக்க முடியாது.
என் மீது நம்பிக்கை வைத்தவர்களுக்காக, விமர்சனம் செய்தவர்களுக்காக, பாராட்டியவர்களுக்காக, என்னுடன் கடினமான காலகட்டத்தில் உடன் இருந்தவர்களுக்காக நன்றி தெரிவிக்கிறேன். என்னுடைய கிரிக்கெட் வாழ்க்கை இனிமையாகவும், மறக்கமுடியாத நினைவுகள் கொண்டதாகவும் இருக்க உதவிய அனைவருக்கும் மீண்டும் நன்றியைத் தெரிவிக்கிறேன்.
இவ்வாறு ஆர்.பி.சிங் தெரிவித்துள்ளார்.
உத்தரப்பிரதேச மாநிலத்தைச் சேர்ந்தவர் ஆர்.பி.சிங். இந்திய அணியில் கடந்த 2005-ம் ஆண்டு தேர்வான ஆர்.பி.சிங், ஜிம்பாப்வே அணிக்கு எதிரான ஒருநாள் தொடரில் அறிமுகமானார்.
இந்திய அணிக்காக 13 ஆண்டுகள் விளையாடியுள்ள ஆர்.பி.சிங், 14 டெஸ்ட் போட்டிகளில் விளையாடி 40 விக்கெட்டுகளையும், 58 ஒருநாள் போட்டிகளில் 69 விக்கெட்டுகளையும், டி20 போட்டியில் 20 விக்கெட்டுகளையும் வீழ்த்தியுள்ளார்.
கடைசியாக 2011-ம் ஆண்டு இங்கிலாந்து தொடருக்கான அணியில் ஆர்.பி.சிங் இடம் பெற்றார். அதன்பின் அணியில் இருந்து நீக்கப்பட்டார்.
ஐபிஎல் தொடரில் கடந்த 2008-ம் ஆண்டு டெக்கான் சார்ஜர்ஸ் அணியில் அதன்பின் கடைசியாக 2016-ம் ஆண்டு புனே சூப்பர் ஜெயின்ட்ஸ் அணியிலும் ஆர்.பி.சிங் இடம் பெற்றார். இதுவரை 86 போட்டிகளில் விளையாடியுள்ளார்.
மேலும் 94 முதல்தரப்போட்டிகளில் விளையாடி 301 விக்கெட்டுகளையும், உள்ளூர் டி20 போட்டிகளில் 132 போட்டிகளில் 142 விக்கெட்டுகளையும் ஆர்பி.சிங் வீழ்த்தியுள்ளார்.