டி வில்லியர்ஸ் கிட்ட இருப்பதை விட, சூரியகுமார் யாதவ்-க்கு இப்படியொரு ப்ளஸ் இருக்கு – முன்னாள் வீரர் பேச்சு!
சர்வதேச கிரிக்கெட் போட்டியில் 360 டிகிரி பிளேயர் என அழைக்கப்படுபவர் தென் ஆப்பிரிக்காவை சேர்ந்த ஏபி டிவில்லியர்ஸ். மைதானத்தில் அனைத்து புறங்களிலும் அடிக்கும் அசாத்திய திறமை பெற்றவர் என்பதால் அவருக்கு இப்படியொரு பெயர் கொடுக்கப்பட்டது.
அதேபோல் இந்தியாவின் மிஸ்டர் 360 என்று அழைக்கப்பட்டு வருபவர் சூரியகுமார் யாதவ். இவரும் டிவில்லியர்ஸ் போன்று மிட்-விக்கேட், மிட்-ஆன், ஸ்கொயர், லெக், பைன்-லேக் என அனைத்து பக்கங்களிலும் அசாத்தியமாக அடிப்பதால் இப்படியொரு செல்ல பெயர் கொடுக்கப்பட்டிருக்கிறது.
சமீபத்தில் நடந்து முடிந்த இலங்கை அணியுடனான மூன்றாவது டி20 போட்டியில் சதம் விளாசி டி20 போட்டிகளில் மூன்று சதங்கள் அடித்த இரண்டாவது இந்திய வீரர் என்ற பெருமைக்கு சொந்தக்காரர் ஆனார். மூன்று சதங்களும் 200 பிளஸ் ஸ்ட்ரைக் ரேட்டில் அடித்திருக்கிறார். இதற்கு முன்னர் எவரும் இதை செய்ததில்லை.
தொடர்ச்சியாக சூரியகுமார் யாதவ் டிவில்லியர்ஸ் உடன் ஒப்பிட்டு பேசப்பட்டு வரும் நிலையில், டி வில்லியர்ஸ் விட சூரியகுமார் யாதவ் இந்த விதத்தில் சிறந்தவர் என்று தனது கருத்தை முன் வைத்திருக்கிறார் முன்னாள் இந்திய வீரர் அஜய் ஜடேஜா.அவர் கூறுகையில்,
“கிரிக்கெட் உலகம் கண்ட மிகச்சிறந்த வீரர்களில் ஒருவர் டி வில்லியர்ஸ். பவரான ஷாட்கள் அடிப்பதில் கை தேர்ந்தவர். மிஸ்டர் 360 என்ற பெயருக்கு பொருத்தமானவர். சூரியகுமார் யாதவ் இவருடன் ஒப்பிட்டு பேசப்பட்டு வருவது இந்தியாவிற்கு பெருமையாக இருக்கிறது. ஆனால் டி வில்லியர்ஸ் விட சூரியகுமார் யாதவ், இடைவிடாமல் சிறப்பான ஆட்டங்களை வெளிப்படுத்தி வருகிறார் மற்றும் ரிஸ்ட்களை நிறைய பயன்படுத்துகிறார்.
டிவிலியர்ஸ் ஸ்வீப் அடிக்கும்போது சில நேரங்களில் திணறியுள்ளார். ஆனால் சூரியகுமார் யாதவிடம் அப்படி ஒரு பிரச்சினை இல்லை. ஏனெனில் ரிஸ்ட்டை முழுமையாக பயன்படுத்துகிறார். தனது கையை முழுவதுமாக ஸ்வீபிற்கு எடுத்து வந்து அந்த ஷாட் அடிக்கிறார். இந்த விதத்தில் சூரியகுமார் தனித்து நிற்கிறார்.” என பேசியுள்ளார் அஜய் ஜடேஜா.
