ஐசிசியின் டெஸ்ட் கிரிக்கெட் தரவரிசையில் பேட்ஸ்மேன்களுக்கான பட்டியலில் ஆஸ்திரேலிய கேப்டன் ஸ்டீவ் ஸ்மித் 945 புள்ளிகளுடன் முதலிடத்தில் உள்ளார். இந்திய கேப்டன் விராட் கோலி 893 புள்ளிகளுடன் 2-வது இடத்தைத் தக்கவைத்துக்கொண்டுள்ளார். இதையடுத்து டான் பிராட்மேனின் 961 புள்ளிகளுக்கு நெருக்கமாகச் சென்று 945 புள்ளிகள் எடுத்திருப்பது கிரிக்கெட் உலகை ஆச்சர்யப்படுத்தியுள்ளது.
ஐசிசியின் ஒருநாள் கிரிக்கெட் போட்டிகளுக்கான பேட்ஸ்மேன்கள் தரவரிசையில் இந்திய வீரர் ரோஹித் சர்மா 2 இடங்கள் முன்னேறி 5-ஆவது இடத்துக்கு வந்துள்ளார்.
கோலி ஓய்வு காரணமாக இலங்கைக்கு எதிரான ஒருநாள் தொடருக்கு தலைமை வகித்த ரோஹித், பட்டியலில் முதல் முறையாக 800 புள்ளிகளை கடந்து 816 புள்ளிகளுடன் உள்ளார். முன்னதாக, மொஹாலியில் நடைபெற்ற 2-ஆவது ஒருநாள் போட்டியில் அவர் இரட்டைச் சதமடித்தபோது 825 புள்ளிகளை எட்டியிருந்தது குறிப்பிடத்தக்கது.
இதேபோல், அந்தத் தொடரின் கடைசி ஆட்டத்தில் சதமடித்து ஆட்டமிழக்காமல் இருந்த ஷிகர் தவன், ஓரிடம் முன்னேறி 14-ஆவது இடத்துக்கு வந்துள்ளார். ஓய்வில் இருக்கும் கோலி 876 புள்ளிகளுடன் பட்டியலின் முதலிடத்தில் தொடருகிறார்.
பந்துவீச்சாளர்களுக்கான வரிசையில் யுவேந்திர சாஹல் 23 இடங்கள் முன்னேறி 28-ஆவது இடத்தைப் பிடித்துள்ளார். இலங்கைக்கு எதிரான ஒருநாள் தொடரில் அவர் மொத்தமாக 6 விக்கெட் வீழ்த்தினார். இதில் கடைசி ஆட்டத்தில் மட்டும் அவர் 3 விக்கெட் எடுத்திருந்தார்.
அதேபோல் குல்தீப் யாதவ் 16 இடங்கள் முன்னேறி, முதல் முறையாக 56-ஆவது இடத்துக்கு வந்துள்ளார். ஆல் ரவுண்டர் ஹார்திக் பாண்டியா 10 இடங்கள் முன்னேற்றம் கண்டு 45-ஆவது இடத்தில் முதல் முறையாக தடம் பதித்துள்ளார்.
இலங்கை அணியைப் பொருத்த வரையில், பேட்ஸ்மேன்கள் வரிசையில் உபுல் தரங்கா 15 இடங்கள் முன்னேறி 36-ஆவது இடத்துக்கும், நிரோஷன் டிக்வெல்லா 7 இடங்கள் முன்னேறி 37-ஆவது இடத்துக்கும் வந்துள்ளனர்.
பந்துவீச்சாளர்கள் பட்டியலில் சுரங்கா லக்மல் 14 இடங்கள் ஏற்றம் கண்டு 22-ஆவது இடத்துக்கும், ஆல் ரவுண்டர் ஏஞ்ஜெலோ மேத்யூஸ் 9 இடங்கள் ஏற்றம் கண்டு 47-ஆவது இடத்துக்கும் வந்துள்ளனர்.
ஒருநாள் போட்டி அணிகளுக்கான வரிசையில் இந்தியா 119 புள்ளிகளுடன் 2-ஆவது இடத்தில் நீடிக்கிறது.
டெஸ்ட் கிரிக்கெட்டில் அதிக புள்ளிகள் எடுத்துள்ள பேட்ஸ்மேன்கள் பட்டியலில் ஹட்டனுடன் இணைந்து 2-ம் இடத்தில் உள்ளார் ஸ்மித்.
டெஸ்ட் கிரிக்கெட்டில் அதிக புள்ளிகள் எடுத்துள்ள பேட்ஸ்மேன்கள்
961 – டான் பிராட்மேன், 1948
945 – லென் ஹட்டன், 1954
945 – ஸ்டீவ் ஸ்மித், 2017
942 – ஜேக் ஹாப்ஸ், 1912
942 – ரிக்கி பாண்டிங், 2006
தரவரிசைப் பட்டியலில், பந்துவீச்சாளர்களில் இங்கிலாந்தின் ஆண்டர்சன் முதலிடத்தில் உள்ளார். ஆஷஸ் மூன்றாவது டெஸ்டில் அசத்திய ஹேஸில்வுட் டாப் 5 பட்டியலில் இடம்பிடித்துள்ளார்.
ஐசிசி – பேட்ஸ்மேன்கள் தரவரிசை
1. ஸ்டீவ் ஸ்மித்
2. விராட் கோலி
3. புஜாரா
4. கேன் வில்லியம்சன்
5. ஜோ ரூட்
ஐசிசி – பந்துவீச்சாளர்கள் தரவரிசை
1. ஜேம்ஸ் ஆண்டர்சன்
2. ரபடா
3. ஜடேஜா
4. அஸ்வின்
5. ஹேஸில்வுட்
ஐசிசி – ஆல்ரவுண்டர்கள் தரவரிசை
1. ஷகிப் அல் ஹசன்
2. ஜடேஜா
3. பென் ஸ்டோக்ஸ்
4. அஸ்வின்
5. மொயீன் அலி